教育部台語漢字「的」無合社會上台文標語个需要

目前教育部台語推薦用字，用「的」來寫台語 "ê"，用佇所有格標記（我的[ê]、伊的…），抑是形容詞尾（紅的[âng--ê]、白的…）。

北京話文寫〔我的、紅的〕本是向古漢字「借音」來用个，佮「的」--字佇文言文本來个用法（明白、確實、目標…）無關係；台語做儂个新婦仔，才閣抾北京話文即个「的」，「借義」來訓用，重重疊疊，借幾若手。

提北京話文用字「的」來訓用台語所有格佮形容詞尾，是台語流行歌詞佮戰後長老教會漢字版詩歌个習慣（毋過毋是南管戲文、歌仔冊个傳統用字）。

論真，流行歌詞佮教會詩歌毋是獨立个文本，只是歌樂个輔助品爾爾，也就是講，耳空哪聽台語歌樂，目睭哪看遮个歌詞做參考，學會曉歌樂以後，就將歌詞囥一邊，所以台語流行歌詞雖然有足濟訓用字也無差。

但是咱是欲寫有獨立性个台語文，包括成篇个文字、抑是招牌、傳單。即个 "ê" 是台語極常用、極重要个特色標記，佮華語音 ㄉㄜ‧ 明顯無仝。

短短一句台語標語，若寫「的」--字，看著即句標語个台灣儂，干焦會用華語唸，袂想講是台語文。一定愛有咱專用个寫法，逐家才會注意著彼是欲愛儂唸台語。

目前社會各界，上迫切个應用台語文个需要，實在毋是規篇个台文，是短短个招牌、宣傳文字，希望予眾儂一看自然就用台語唸。教育部叫咱 "ê" 寫做「的」--字，無法度應合社會即種需要。

補充：日本儂个台語文獻也是攏寫「的」，但是伊是每一个漢字攏有附假名音標，怹迄種漢字台文甚至比台語流行歌詞閣較無獨立性。凡若無夠獨立性个台文形式，訓用字攏特別濟，所以愛倚靠歌聲抑是音標个輔助來確定呼音。