連紲短片是害儂縫，毋是暢空

連紲短片是害儂縫[hāi-lâng-phāng]，毋是暢空[thiòng-khang]

TikTok 个短片霸佔全球人類个耳目，Youtube、IG、Facebook 攏綴咧引進「連紲短片」。即種媒體形式反映專制政權無愛予人民家己代先搜揣、 決定視聽內容个權力。網站背後个大魔神仔用一塊閣一塊个短片侵踏入咱个心腦， 閣予儂歡喜甘願來接收內中个訊息。

遮个短片看起來大部份攏是各地網民 主動製作、上傳--个， 但是無儂知影啥乜影片會得予系統揀捒[kíng-sak]來到咱个螢幕面頂 （雖然使用者會使「跟綴」(follow) 伊佮意个內容製作者）， 也無儂知影啥乜影片是大魔神仔為著啥乜目的晟持[tshiânn-tî]出來个。

遮个短片對咱有路用个資訊，十成較無半成，差不多攏是咧予儂看爽--个爾爾。 一片幾十秒、無仝个主題、內容，一片接一片，會凍一直維持刺激性，予儂看規暝， 爽袂退，比肉片仔較厲害！

除起[tî-khí]咱有意識去接受个訊息，影片內底，到底有隱囥[ún-khǹg]啥乜心理暗示， 不斷咧共咱洗腦，咱毋知。

內容消費者啥儂有才調好好仔利用遮个短片來過一个較幸福美滿个人生， 閣袂去予伊利用去咧？

註：

1. 是害儂縫，毋是暢空[sī hāi-lâng-phāng, m̄-sī thiòng-khang]： 俗語，形容表面上予儂會爽、會暢个好空个物件、所在，其實是害儂不淺个陷阱。 「縫」、「暢」、「空」遮个字眼有性暗示。

2. 侵踏 tshim-ta̍h：對「侵門踏戶」提煉出來个兩字動詞。

3. 晟持 tshiânn-tî：撫養[bú-ióng]。俗語：歹儂囝兒，好儂晟持。