予聯考拒絕个小囝

《拒絕聯考的小子》吳祥輝當年足tshìng（最近幾年伊寫幾若本探討歐洲幸福小國家个冊，重閣tshìng起來）。

阮是屏東个庄跤囡仔，袂記得是讀國小抑是國中个時，阿兄提迄本冊轉來，我嘛綴伊偷看。內底有一寡描寫，對單純个囡仔來講，足刺激，到今[tann]印象閣真深。

我後來國中畢業，煞無代無誌，扑破阮學校个記錄，有史以來第一个去台北考，而且也考椆建中。這佮伊即本冊絕對有關係。

結局，建中个經驗，對我一生影響足大，也留下真濟痛苦个回憶。平平是建中生，伊是拒絕聯考个小囝，抑我是予聯考拒絕个小囝。

聯考个制度本身無講偌毋好，足䆀[bái]个是社會、學校个態度佮教育方式。到今我閣有 PTSD（創傷後个症頭），只要日--時壓力卡大，咧睏就會夢見閣轉去中學个教室。