佔儂便宜，台語單字動詞是【偏 phinn】，像「毋通偏[phinn]--儂」，但是咱有時會聽著有儂講做「毋通 phenn--儂」，這是過度類推生出來个「新漳音」，時行佇台南市一帶。
「過度類推」佇遮个意思是講：有真濟字，泉音唸 -inn 韻母，對應个漳音是 -enn 韻母，像「生 sinn/senn、青 tshinn/tshenn、星 tshinn/tshenn、羹 kinn/kenn、更 kinn/kenn、醒 tshínn/tshénn、姓 sìnn/sènn、暝 mî/mê、鄭 tīnn/tēnn……」等等。但是也有一寡字，無分漳泉，白話音攏是 -inn，並無泉腔唸 -inn，漳腔唸 -enn 个對應關係，親像「鮮 tshinn、天 thinn、邊 pinn、篇 phinn、偏 phinn」，遮个字咱若掠叫是偏漳音著唸 -enn，這就是過度類推。
本底「偏」即字文言音 phian，白話音無分漳泉攏唸 phinn，這佮「鮮、天、邊、篇」仝款，文音 -ian 韻母（sian、thian、pian、phian），對應白話音是 -inn 韻母，本底並無唸做 -enn 个腔。
即个【偏 phinn】本來並無腔口差，佮【分伻 pun-phenn/phinn】个「伻」有漳泉差，是無仝韻類。就親像【鹼粽 kinn-tsàng】个【鹼 kinn】無漳泉差，但是【肉羹 bah-kenn/kinn】个【羹 kenn/kinn】有漳泉差，情形類似。
【伻 phenn/phinn】是分配、分攤、pun儂用，佮【偏 phinn】是佔儂便宜，意思差大碼。
食虧落衰叫做「食kinn」，即个kinn是 kinn粽个 kinn（鹼粽好食，不過咱若直接食鹼會中毒），但是有袂少儂煞講做「食kenn」，這佮「偏」生出 phenn 个音是仝款道理：過度類推。結果將「食鹼」當做是「食羹」咧講，「食羹」真爽，哪會有食虧落衰个意思咧？
目前有收「偏 phenn」个書面辭典是吳守禮教授閣有董忠司教授个字辭典，怹兩位攏是台南市儂，可見即个過度類推个「偏 phenn」佇台南市已經通行真久，毋是中少年輩个台南市儂才按呢講。
台南市是漳泉混合腔區，總是，enn/inn 即个漳泉對應韻類，怹攏唸漳腔 enn，而且閣進一步類推到「偏」字去。「偏 phinn」唸 phenn 算是台南市特色，這無論是中部漳腔，宜蘭漳腔，抑是福建漳州各地，一般並無按呢講，若正實有，也是個人現象，毋是地區腔。泉腔區就愈無可能講做 phenn。
補充：除了台南市，南部一寡地區也有講【偏 phenn】，總--是，目前猶未普遍化。過度類推个音變若湠開去閣穩定落來，就會變成一種腔口。
【偏】有兩字个講法【偏崁 phinn-khàm】，即个詞本底也並無講 phenn-khàm，問題是既然「偏」有儂正實講做 phenn，「偏崁」會講做 phenn-khàm 就無奇怪矣。
蔡培火个白話字著作 Cha̍p-hāng Koán-kiàn（十項管見）即本冊（1925年出版），內中就有出現兩擺「偏崁」，佇 p.33 是印做 phiⁿ-khàm，到 p.110 煞變做 pheⁿ-khàm。蔡培火是偏泉腔个北港儂，伊講伊出外真濟年，不知不覺腔口已經混雜去，伊即本冊手稿寫完，有閣拜託儂改做廈門腔來出版，其實修改者是採用台灣南部个優勢腔，佮廈門腔差真濟。蔡培火雖然台語一流媠、漢文冊底也真深，總--是，咱通講伊對閩台語腔口並無了解。
雖然按呢，pheⁿ-khàm 即種講法佇 1925 年就出現，會用得旁證「偏」講做 phenn 佇台南大概佇二十世紀初就出現，只是無蓋普及，像白話字教會公報捌有六篇文用著 phiⁿ-khàm（1892.09、1922.02、1923.04、1931.11、1938.03、1963.01），但是從來無儂寫做 pheⁿ-khàm。白話字教會公報个文章一般也是用南部漳泉濫个腔口為主，毋是用廈門腔。
Comments powered by Disqus.