俗語「瞞生儂目，答死儂恩」

今仔日欲講个台灣俗語是「瞞生儂目，答死儂恩」[muâ sinn-lâng ba̍k, tap sí-lâng un]。序大儂在生个時，無有孝怹，過身个時，才開大錢將喪事辦甲足tshia-iānn、鬧熱，「在生無一粒塗豆，死了才咧孝豬頭」，講是欲報答父母个恩情，究真只是咧做予外儂看，瞞騙活儂个目睭niâ。

謝長廷先生過去中國進行「私人活動」，但是伊去遐一切个舉動，攏有政治效果；中國當局遐爾熱烈來迎接、款待伊，當然嘛是 it著伊佇台灣政界个地位佮影響力。

所以這絕對毋是平常百姓个祭祖，是身為台灣在野黨个頭儂，去到中國，講是欲「答死儂恩」來祭祖，窮實[khîng-si̍t]是咧「瞞生儂目」，來代表台灣最大在野黨，暗認中國是台灣个祖國，台灣是中國个序細！

伊個人欲祭祖，咱愛尊重，但是伊有特殊身份，煞按呢做，對台灣欲佮中國平坐徛，是傷害。

細漢定定聽著黃俊雄布袋戲个一句戲文：「瞞--者 瞞不識，識--者 不能瞞」[muâ--tsiá muâ put sik, sik--tsiá put-lîng muâ]。咱台灣儂著愛卡識巧[sik-khiáu]咧，毋通予政治仔瞞騙出賣去。