「偈」个台語音

佛教个「偈 kī」，是「頌」个意思，是佛教徒咧吟唱个一種詩歌，本來有押韻。傳去支那（佛經稱呼 China），欲翻做漢語，為著顧全意思，就犧牲押韻，變做一種無押韻，但是每一句固定五字、抑是七字个文體。

支那儂仿即種文體所做，出名个偈，有武則天个「開經偈 Khai-king-kī」：

無上甚深微妙法 Bû-siōng sīm tshim bî-biāu huat
百千萬劫難遭遇 Pik-tshian bān-kiap lân tso-gū
我今見聞得受持 Ngóo kim kiàn-bûn tik siū-tshî
願解如來真實義 Guān kái Jû-lâi tsin-si̍t gī

閣有禪宗六祖惠能大師講个：

菩提本無樹 Phôo-thê pún bû sū
明鏡亦非台 Bîng-kìng i̍k hui tâi
本來無一物 Pún-lâi bû it bu̍t
何處惹塵埃 Hô tshù jiá tîn-ai

「偈」是「偈他」（也有寫做「偈佗」「偈陀」）个簡稱，「偈他」是梵語 Gāthā 音譯（ā 是指長音 a，頂面迄劃毋是聲調）。

按呢看起來，「偈」字「原始閩語」應該是 /ga/ 去聲。台語若照中古音反切「其例切」，是 kē（「偈」也有唸入聲 kia̍t，意思無仝，遮無論）。近現代个閩、台語是唸 kī 抑是 khì。

按呢咱看會出「偈」變音个痕跡[hûn-jiah]，就是對「低元音 a」->「中元音 e」->「高元音 i」。這是漢語歷史聲韻學定定看會著个音變方向。

一寡台文界先進，會掠中古音反切做聖經，來「訂正」台語音。我真細膩，盡量尊重兩百年來，閩、台語韻書佮漢文先生个傳承。

像即个例，咱若提中古音 kē 來取代 kī，講按呢較正宗，問題是梵語个本音是低元音，比中古音較早个上古閩語應該也是用低元音來音譯。按呢咱是毋是著進一步偃倒 kē，改唸 kā，甚至 gā？

所以，提反切出來个 kē 來否定 kī 个唸法，通講是五十步笑百步，kē 離原音五十步，kī 離原音百步。按呢不如繼續採用兩三百年來所傳承个台語音就好，毋通自我作古，來推翻咱个先賢。

無論是徛佇現代語言學个立場，抑是徛佇尊存台灣先賢个立場，我攏無贊成「直接」提中古音反切來當做台語文言音，咱應當保惜閩、台語韻書佮早年个漢文傳統，若拄著衝突个所在，才參考中古音來取中和（折衷 tsiat-thiong）。