老輩儂[lāu-puè-lâng]四常用具體个語詞來表達普遍的[phóo-piàn-tik]、抽象的[thiu-siōng-tik]个概念，像「種 tsìng」即種普遍概念，具體來講，有「插 tshah」（插甘蔗）、「硩 teh」（硩番薯）、「墊 tiām」（墊豆仔）……。閣親像相借問，也無講「汝好」、「晚安[buán-an]」即種抽象个話，是講「食飽未？」「猶未睏？」等等。
囡仔欲騎車出門，序大儂就叫伊「騎較慢咧」，毋是講「路–裡細膩」（比較華語講〔路上小心〕）。
我袂反對吸收華語个表達法來豐富台語，總–是，我也盡量設法抾[khioh]古早儂个好話轉來用。
下晡，一位好朋友佇 Facebook 私訊予我，意思是伊袂赴過來渡我去讀冊會，愛我家己去，伊欲對外地直接過。我回寫講：「了解。車駛較慢咧。」伊回講：「哈哈，我會小心的。」。
扑算伊是誤解我是咧暗示伊車駛傷雄，叫伊毋通按呢。其實我只是欲表達一般性个關心。
我欲將古早話恢復轉來用，捌拄著對方一寡反應，予我料想袂到。以上是其中一種，雖然字面意思伊完全了解，但是真正个心意會掠袂準。其他閣有袂少話語，凡勢仔對方連字面也聽無，迄種个，我就無啥敢佇生活中趕急个時，提出來講。若有時間當面慢慢仔交談，有足額个互動方式，才會用。
當然，也捌有足濟擺，是對方真自然講出啥乜話，是我細漢無聽過，抑是後來有佇文獻讀著，但是第一擺聽儂講著个。拄著即種，我攏會暗爽在心內。
對方整體个台語程度可能無較好--我，但是伊也有真濟台語智識通予我學習。只要我堅持用溫和親切个態度佮伊講台語，伊雖然平時較罕得講台語，嘛會盡量對我講台語，予我有機會「偷學」。
承蒙林振福先生佇 Facebook 回應，詳細說明予咱明瞭，「插、硩、墊」即三項種作个動詞，差別佇佗位：
甘蔗種是一橛甘蔗[插]入塗裡，蕃薯栽是一節蕃薯藤手揤入起番薯壟，才用塗共[硩]咧；若是用種籽，就用挖(iah)仔挖一孔，才共種籽[墊]落去孔內底，才koh共孔喙用塗掩起來。一項硬(ting7)的用[插]，一項軟的用[硩]的，一項種籽用[墊]的。
Comments powered by Disqus.