台灣俚語：在室女有出寶

台日典上冊p.584【在室女 tsāi-sik-lú】个例句真心適： 「在室女有出寶」[Tsāi-sik-lú ū tshut-pó]。

日文解說：「箱入娘（はこいりむすめ）に蟲（むし）がつく。」 台語俚語用日語俚語來解說，兩句攏毋是字面意思。

「箱入り」原意就是將珍寶收囥入去箱仔內保管，「箱入り娘」就是指千金小姐、 掌上明珠，予序大儂保護踮厝內惜命命，毋甘予伊出去。 「箱入り娘に虫がつく」結果寶貝查某囝个身軀煞生蟲，比喻小姐佮儂有染[iú-jiám]。

台語另外一句類似个俚語「規坵番薯攏臭香[tshàu-hiunn]去矣」， 是暗喻未出嫁个查某囡仔佮儂發生性關係，嫁袂出去矣。

即句比「在室女有出寶」个修辭手路閣較隱晦[ún-huè]。 「在室女有出寶」个主語「在室女」猶原是明語，聽話者閣知影所講个對象； 「規坵番薯攏臭hiunn去矣」無論主語、述語攏是暗喻， 所以若是語境个提示無夠明顯，聽者就完全毋知是啥意思。

以上个台語、日語俗語攏是反映古早觀念，扑算有較過時矣，總–是， 疼惜查某囝，驚伊予歹儂拐去，是千古不變个爸母个心情。

補記：我毋知影「出寶」佇遮按怎解說較著。台日典「出寶」解說講： 「【撚寶 lián-pó】をする時（とき）の子（こ）の座席（ざせき）」， 這佮「在室女有出寶」个意思毋知按怎牽連？

佇面冊徵求先進賜教，結果就有面友來寄話講：

前輩，小弟淺見，想著「肚下有châi，châi下有寶，寶若現，大lān就臨頭」彼句笑詼。 諒必有牽連，拍算就是「有出寶」的意思。

即个解說扑算有通，按呢佮「撚寶」用語就無干礙。