台灣儂添飯个禁忌

去一間餐廳食飯，看著一个卡大食[tuā-tsia̍h]个儂客講欲先加添[ke thinn]一碗飯，少年頭家怹阿姐（三十幾歲）添一碗尖尖來予伊。頭家媽[má]（頭家怹阿母）看著，笑笑共儂客會失禮，講：「阮查某囝有夠條直，食無夠閣添就好，哪著添遐大碗？」

咱咧食飯，一碗飯袂用得添尖尖，這是民間个禁忌[kìm-khī]，只有祭拜往生者才有添尖尖。想袂到即位做食个姿娘毋捌風俗。頭家媽知影，對儂客歹勢，但是當然袂使直接講明即種禁忌，所以才再三用「條直」來形容怹查某囝。

就實用觀點來看，飯若添傷尖，無好扒飯，無細膩飯粒仔就會seh落去飯桌頂、塗跤兜，扑損閣歹掃。

其他个禁忌：

〇 箸袂使直直插佇飯碗頂，這仝款是祭拜个風俗；

〇 箸袂使得一直硞[kho̍k]碗盤，因為乞食咧共儂分[pun]才按呢；

〇 添飯个時，飯匙毋通大大下thuh一飯匙就添到滿。這無到「禁忌」遐嚴重，毋過著愛特別注意。

食飯禮儀：

〇 先扒一喙仔飯，才開始挾菜。

〇 毋通「騎馬坐、挽弓食」[khiâ-bé tsē, bán-king tsia̍h]。

……其他个細節閣足濟，是為著無愛予仝桌食飯个儂無爽快，所設个生活教育。

註：華語「添飯」，台語「添飯 thinn-pn̄g、貯飯 té-pn̄g」兩个詞攏有講。煞有儂認為台語「添飯」是學華語个，毋是啦。

（Facebook 2012-10-10）