昨昏2011年10月29號，參加台灣本土文化書局舉辦个郊遊，去行[kiânn]海線五小驛[gōo sió-ia̍h]，早起佇追分驛 眾儂會齊，九點半上火車。
有一个查某遊客坐佇我倒手爿，姑娘仔伊phua̍h一台類單眼[luī-tan-gán]个相機，頭戴一頂幼秀个圓草帽仔，身穿軟質个長䘼[ńg]衫，雙重lè-suh个白裙，烏網紗[bāng-se]个褲襪，閣tha̍h一雙棉襪仔到跤目，外口才是包仔鞋。伊哪聽伊倒手爿一个少年家咧講話，哪對家治个kha-báng提出一張地圖，一本旅遊冊咧掀看。兩个儂閣互相分享隨儂捌去過台灣南北啥乜宮廟[king-biō]、啥乜景點。
聽怹講話个內容，特別是查埔囡仔客氣客氣个聲說[siann-sueh]，怹兩儂敢哪毋是男女朋友。毋知查某囡仔咁是透早著起床，費神將家治打扮甲美麗閣肆是，出來欲佮熟似[si̍k-sāi]無久，但是平平意愛幼路旅遊[iù-lōo lí-iû]个網友約會？不而過，我看伊冷靜自在个神色，我閣卡相信伊一向出來𨑨迌，攏是按呢咧穿插。
阮 uì追分、沿路停睏佇日南、談文、大山跤、新埔五个小驛頭，一路無閣注意著即兩儂个形影。到甲尾晡仔，佇新埔海邊，秋茂園[Tshiu-bōo-hn̂g]後壁，海風hù-hù叫个護岸[hōo-huānn]頂，無派胚予我看著即个查某囡仔，拄好正手提一台大台个單眼相機，倒手將家治个草帽仔揤[tshi̍h]咧，ànn腰咧共迄个少年家翕像，翕[hip]了，相機還查埔，閣提家治迄台予少年家，兩个相放伴[sio pàng-phuānn]翕獨照[to̍k-tsiàu]。
簡單先記一下^^ 準備歇睏
Comments powered by Disqus.