「台灣獨立」佮「中國儂來台做主」根本矛盾

在台中國生欲選學生會長，統派个儂贊同，這是必然个。但是不可思議个是，真濟過去大聲喝出「我是〇〇〇，我主張台灣獨立」个儂，嘛足歡迎中國生來參選做頭，講按呢才有民主、有人權。

咱攏知，太陽花運動只不過是暫時阻擋中國儂進入台灣爾爾，只要國民黨繼續掌權（甚至換民進黨執政嘛仝款啦），未來个大趨勢就是中國儂一定會大量來台就業。

平平是儂，中國學生咱愛容允怹加入台灣校園个自治組織，享受會長被選權，到時所有个中國在台工作者，咱嘛著比照仝款个人權原則，容允怹加入台灣工會，享受會長參選權。

台灣大大細細个工商團體，攏有中國儂來競選做主，按呢台灣欲按怎獨立？

一方面大聲喝講「我是〇〇〇，我主張台灣獨立」，一方面閣歡迎中國儂來台參選做主，咁毋是矛盾个主張，錯亂个思想？

台灣个大學，長期以來攏有收外籍生，從來毋捌有外籍生參選學生會長，但是中國學生一下來，經營兩、三年，建立一寡儂脈，馬上就欲競選學生會長。可見怹足愛進入台灣校園做頭儂領導台灣學生，這佮中共足愛進入台灣政壇做頭儂領導台灣儂，立場完全一致。

中籍生个參政權，無應該比照一般外籍生，閣較無應該比照台灣生，齊頭享受一切个學生權益，若無，咱真緊會予中國併吞。

中共當局過去一直放據在蔡博藝佇台灣深入從事違背中國利益个反服貿運動，咱對最近个發展來看，就愛覺悟講，原來按呢做，就會凍爭取著台灣新一代台獨主張者个意愛佮認同，並且支持中國儂領導台灣儂。

以上所論即種矛盾个主張，統派看甲一清二楚，所以怹就趁即个好時機，跳出來歹意中傷真正堅定个台獨主義者，罵講為著守護台灣主權，反對中生選會長，就是「台獨納粹」。