「台灣語言文學系」唸台語按怎變調？

台語變調个現象非常複雜，欲掠出「tī時 愛保持本調，tī時 愛變調」个「明文規則」，予一外國儂台語學習者有才調倒手提即套規則書，正手提台語羅馬字文稿（無變調指示），就唸會出完全正確个實際聲調。我恐驚目前閣做袂到。

有儂真條直，聽著專有名詞「台灣大學」四字詞除了尾字以外攏愛變調，煞類推講一切个四字詞攏愛照按呢去變調。這實在傷過「天真」。

若是按呢，咱請問：設使拄著五字名詞、六字名詞、七字、八字等等咧，攏愛照按呢變？

舉例：「台灣語言文學系」（Tâi uân gí giân bûn ha̍k hē），即組七字詞若前六字攏變調，其實是勉強有意識去遵照「只要是一个詞，前字攏愛變調」个人工規則去硬弓出來个，實在毋是咱自然就唸會出來个講法。

意思就是講，若是一个無了解迄套人為記錄个台語變調規則个儂，準做伊是精通台語口語佮文言文个漢文老先生，伊也無可能將「台灣語言文學系」前六字攏唸變調。但是以下个講法就攏有可能佇較自然个情形下出現：

台灣#語言#文學系#
台灣語言#文學系#
台灣#語言文學系# （即種照我判斷，較罕得出現）

但是若即組七字詞，咱一工到暗一直講，講个儂佮聽个儂攏熟甲爛去了後，才有可能會講出「台灣語言文學系#」只有上尾字才唸本調。若是一開始，就強叫儂按呢講，彼是做三跤褲予儂穿，違反任何台語儂自然个講話法。

頂面个意見，佇 Facebook 貼出來了後，有幾位先進回應講「台灣語言#文學系#」怹感覺上自然，這有一个因素，就是「台灣語言」即四字佇最近一、二十年定定出現，逐家定定咧講，才愈來愈感覺即四字做一个變調組來唸足順。

「只要是一个詞，前字攏愛變調」即種執死訣个觀念，拄著愈長个複合名詞，愈會踢到鐵枋，前面七字詞，有儂認為前六字攏變調對伊來講足自然，但是閣較長咧？「國立台灣師範教育研究中心」咧？咁講前十一字也攏愛變調才是自然？無可能啦！上無嘛著唸：

「國立#台灣#師範教育#研究中心#」

至少有四字是保持本調。將「立」唸變調，是錯誤；將「灣」唸變調，是硬弓个；但是「範」唸本調，無算錯。

台語變調个現象，絕對毋是「語法結構」會使決定一切，也毋是每一个詞，每一句話，攏只有唯一一種正確个本變調讀法。其中有種種複雜个因素咧交互作用，愛閣精密研究。