台語佮「抱 phō」有關个一寡單字動詞，咱來分別怹个意義、用法个差別：
一、抱[phō]：通常規个儂共伊離地抱起來，主要用佇儂、動物，有性命个。上捷講「抱囡仔」「抱孫」。
日本時代台灣儂剾洗日本儂風俗个唸謠：
儂插花，伊插草
儂抱嬰，伊抱狗
儂未嫁，伊先走
儂坐轎，伊坐畚斗
儂睏紅眠床，伊睏屎礐仔口
儂到厝，伊到橋仔頭
儂hah-hah笑，伊目屎nih-nih流。
二、攬[lám]：無離地个抱。可比講「對下腰[ē-io]共愛人仔攬咧」。朋友互相表示親切，是講「來，攬--一下！」，毋是「來，抱--一下」。
三、尋[siâm]：強調雙手「環抱」，無離地。可比講「怹兩个尋[siâm]咧跳舞」。「一尋大[tsi̍t-siâm-tuā]个樹仔」就是華語【合抱的大樹】；「兩尋大[nn̄g-siâm-tuā]」，就是【兩人合抱那麼大】。
例句一：囡仔真驚，對後壁共我siâm椆椆[tiâu]，毋敢放。
例句二：熱甲欲死，入去博物館，看著大理石柱，khah-mí siâm咧，哇！足涼。
若毋是大理石柱，是大理石壁，咱展[thián]開雙手去 mooh 咧，嘛會用得焐[ù]涼。即種 mooh 是強調【平貼附著】，毋是【環抱】。
「尋」佮「攬」比，攬，意思卡一般化，一手嘛會用得攬，兩手嘛會用得攬。siâm 才特別指雙手環抱，所以愈幼路，畫面愈活。
許嘉勇老師賜教：『逐家毋知捌去孔子廟酙酌看--過無？一般若照規制所起的孔子廟，攏會佇廟前﹝立在（tshāi）﹞一塊「萬仞宮牆」的石碑，彼字「仞」的意思就佮咱台語的「尋」仝款，也就是一个成年的ta-poo人兩肢手的長。《說文》：「仞，伸臂一尋八尺也。」』
四、幔[mua]：卡輕力，搭佇表面，定定用佇「mua肩頭」，像「怹兩个行路相幔[sio-mua]」，即種動作，一般是用一手。「幔」其他个用法，親像「幔雨幔」「幔棕蓑[tsang-sui]」，就是強調大面積，無真峇[bā]，遮崁[jia-khàm]佇表面。
五、mooh：主要是mooh物件，無性命个，親像「mooh一粒大石頭」。嘛會使mooh儂，但是這是將儂當做支持物。華語「抱著一堆書」，台語毋是講「抱[phō]一堆冊」，即種錯誤真濟少年儂有，愛講「mooh一堆冊」。mooh有「依附」个含意，可比講「mooh壁鬼」。
華語【摟抱】，台語「攬抱」；華語【摟摟抱抱】，台語「攬攬抱抱 lám-lám-phō-phō」。
施炳華教授共阮指教講：『華語「摟抱」，南管有「兜攬」一詞，〈昨冥一夢〉(相思引)：「翻身一返，掠君恁障兜攬。」兜(tau)有「扣緊」的意思，如〈看日色〉(望遠疊)：「兜緊弓鞋，阮乜蓮步趕。」〈精神頓〉(倍思三角潮)：「咱來兜緊繡弓鞋，輕牽羅裙，起來窗前悶無意。」〈打疊行李〉(錦板)：「手扳柳梢，掠只金蓮兜定，阮只羅裙倒摺。」
以上「抱、攬、尋、幔、mooh」攏是老儂捷講个單字動詞，其中「尋」即馬中年以下个台灣儂，普遍袂曉得，咱愛共伊抾轉來，完整傳承落去。無，台語會愈來愈簡化，表現力愈來愈差。
我个解說是大原則。另外會出現一寡用法，涵蓋袂著。親像「抱銅柱 phō-tâng-thiāu」是殘忍个「炮烙之刑」；「抱心[phō-sim] / 抱心爿[pîng] / 徛心爿[khiā-sim-pîng]」是華語「豎心旁」。血抱心[hueh-phō-sim]，是一種心臟病。
咱个儂，卡袂慣勢身體接觸；若西洋觀念，真愛攬來攬去，講按呢有益身心，恁想按怎？
Comments powered by Disqus.