教育部台語推薦用字，將疑問助動詞 kám 寫做「敢」，我無趁從--伊，寫做「咁」。助動詞 kám 本字卻然是「敢」，寫「咁」是不得已个借用字，即个借用字，無管伊佇古文个用法，是當做台語个專用字來寫。寫借字，無寫本字，因為台語 kám 佮 kánn 兩音本字攏是「敢」，而且意義發生分化，但是又閣攏會凍出現佇動詞「是、有」等等个頭前，漢字寫法若無分，定定讀錯。
「kám是」「kánn是」佇生活台語、台文，定定出現，親像：
甲：「物件是伊偷提个！」
乙：「敢是？」
丙：「敢是哦……」
若按呢寫，一定蓋濟儂唸袂好勢，將乙、丙所講个「敢」攏唸做 kám，按呢毋著，意思誤解去！改寫做：
甲：「物件是伊偷提个！」
乙：「咁是？」（唸做 kám sī，表示懷疑，感覺可能毋是伊偷提个）
丙：「敢是哦……」「唸做 kánn sī őo，表示感覺真有可能是伊偷提个，佮乙个立場倒反！）
現代台語儂母語退化甲傷離經，雖然 kám sī 普遍會曉講，但是 kánn sī 即種講法，中、少年儂真濟攏袂曉得矣。咱若攏寫「敢」，一定會加速 kánn sī 即種講法个消亡。
舉一个「高級俗語」做例：「鞋襪著跤[ê-bue̍h tioh-kha]，敢是欲去叫儂阿爸[pa]」，看著即句俗語，其中个「敢」請問各位會按怎唸？我臆，現時 99% 會曉台語文个儂攏會唸做 kám。古早庄跤儂普遍散赤，歸世儂罕得穿襪穿鞋，真難得看著某儂按呢打扮，庄裡儂佇邊--仔看著就會滾笑講「某儂鞋襪tioh跤，kánn是欲去叫儂阿爸。」，即个「kánn是」意思是「在我判斷，扑算是，大概是」，毋是疑問句「kám是欲去叫儂阿爸？」
規句俗語个意思就是，伊穿遐tshinn，粧遐媠，扑算是欲去相親，準備欲叫儂阿爸。
台語漢字真歹liú-lak，愛全面列出台語相關个講法來思考。
目前我个做法是，用「咁是」來寫 kám sī，用「敢[kánn]是」來寫 kánn sī，而且閣加註音標（有時規氣直接寫音標）。因為教育部無分，逐家看著「敢是」差不多攏唸 kám sī，所以拄著「敢[kánn]是」个時，我毋但寫漢字，閣愛加注音標。
(Facebook )
Comments powered by Disqus.