問：【和尚】有儂認為台語講白話音 huê-siūnn 是不敬，愛講文言音 hô-siōng 才著。
答：佛教對「和尚」个定義，引用維基：〔佛教出家眾，出家時的親近師，即稱為「和尚」，又稱親教師。和尚與授戒師即阿闍黎意義相近，一位比丘有一位「和尚」，與兩位「阿闍黎」，分別授予他十戒和具足戒，這位比丘是其「和尚」的法統繼承者。後世佛教沿用為弟子對師父之尊稱，又用以指稱德高望重之出家人，或用以稱呼寺院的住持方丈。〕
引用教育部國語辭典：〔和尚：弟子對師父的尊稱。為胡語的音譯，意譯親教師﹑依學﹑近誦等。在中國寺院，一般只用來稱呼寺院的住持比丘﹑或年高德劭的比丘。但民間也以和尚泛稱男性的出家人。元˙王實甫˙西廂記˙第一本˙第一折：「敢煩和尚相引，瞻仰一遭，幸甚。」 〕
台語用法：和尚，一般攏講白話音 huê-siūnn（有腔口差，huê 是漳音，hê 是新泉音、hêr 是老泉音），民間通稱出家个男眾，無特別个敬意，但是也無特別个不敬意，只是中性用語。一般儂無講究遐濟，不管伊有受具足戒無，攏講是和尚，所以和尚包含男眾个比丘佮沙彌，但是無包含女眾个比丘尼佮沙彌尼。
即種通稱用法，無論華語、台語攏仝款，毋是干焦用來稱呼有道行、有地位个出家儂。
因為「和尚」个用法世俗化去，變做只是通稱，而且有袂少孽詰仔話[gia̍t-khiat-á-uē] （無限華、台語）攏是用「和尚」做主詞，像華語〔和尚打傘－－無法無天〕，台語「蹛和尚頭摸虱母」（類似「緣木求魚」个意思）。所以現代儂就歹勢當面叫出家儂「和尚」，若當面叫 huê-siūnn，聽著个儂會感覺真無禮貌。
一代高僧【廣欽老和尚】，長期斷煙火食[tn̄g ian-hué-si̍t]，干焦食寡果子仔。民眾提起，講伊是【果子師 kué/ké-tsí-sai】，較尊敬个叫【lāu-huê/hê-siūnn】（伊嘛歡喜儂當面按呢叫伊），是用親切个態度來表示尊敬，毋是用文言音个「距離感」來表現。
若是特殊个場合，像佛教儀式、典禮，欲將【和尚】用佇教內特殊个敬稱，唸文言音 hô-siōng 就較妥當。但是迄種情形，較袂加一个【老】字。
台語有白話音佮文言音，一个詞日常講白話音，特殊場合特別唸文言音來區別用法，這是台語个幼路、巧妙，咱愛善用。
語言个定義會綴時間佮語境發生變化，會使並存佇無仝時空，無必要提某一種來否定另外一種。但是有寡都合，講話者个意思佮聽話者个理解會無一致，就會發生溝通不良。
重點：台語一般生活應用，「和尚」即个詞攏唸白話音 huê-siūnn，無講文言音 hô-siōng，除非是佛教儀式。當面稱呼出家儂，若叫「和尚 huê-siūnn」就會失禮。毋過有寡有道高僧，顛倒歡喜儂叫伊「老和尚 lāu-huê-siūnn」。總--是，較「保險」个面稱就是「師父 su-hū、老師父 lāu-su-hū」，這無分比丘[pí-khiu]抑是比丘尼[pí-khiu-nî]攏會用得叫。 叫「師父」是以佛門弟子自居，若是基督徒欲稱呼出家僧，thang叫伊「法師 huat-su」。
Comments powered by Disqus.