屏東、高雄、台南，遮个南部腔，喉八聲 -h8 佮第二聲袂啥分明，本來喉八聲是高短調，第二聲是高降調。高短調个喉八聲若無注意著愛雄雄將聲音切斷，做出入聲个效果，聲音一下拖長，著變成佮第二聲分袂清个高降調。比較「路真狹[e̍h]」佮「儂真矮[é]」；「去夜市仔踅[se̍h]」佮「去浴間仔洗[sé]」。e̍h 佮 é；se̍h 佮 sé 愈來愈聽袂出差別。「虼蠽」[ka-tsua̍h] 若無好好仔講，會變做「鉸紙」[ka-tsuá]，袂輸迄種蟲會鉸儂个紙咧。會食儂个紙个蟲，台語叫做「蟫蠽」[tsián-tsua̍h]、「蟫魚」[tsián-hî]、「蟫仔」[tsián-á]。
總是，若變調以後著差蓋濟，「踅夜市」佮「洗夜市」無仝。
台中是 -h8 本調唸做佮 -h4 共款，變調猶原有分，親像「烏白pe̍h」佮「阿伯peh」尾字共音。
另外，中北部有袂少儂 -h8 佮第七聲混同，本來是變調無分，本調有分，即馬連本調嘛無分矣。親像「烏白pe̍h、老爸 lāu-pē」，pe̍h 唸做 pē。
閩台語个入聲，調值佮韻尾攏無穩定，一直咧演變，對 -p/-t/-k 弱化變做 -h （凡若入聲是 -h 个一定是白話音，但是 -p/-t/-k 無一定），閣進一步連 -h 嘛無--去。最後著像北京話按呢攏無無--去喇。但是北京話會閣活甲勇khiàn-khiàn， 台語佇入聲消失以前，歸个語言會先滅無--去。
-p/-t/-k 第四聲變調了後，會變「高短調」。假使汝个腔口（親像南部高屏、台南）， 第八聲本調嘛是「高短調」，按呢才會用得講 ptk第四聲會變做佮第八聲本調共款調值 [tiāu-ti̍t]。若準汝个腔口，第八聲本調毋是高短調，即種講法著無成立。
閣來，-p/-t/-k 第八聲變調了後，會變出一種比台灣多數儂个第四聲本調， 閣卡低一階个調值。親像「綠竹 li̍k-tik」个前字 li̍k，絕對比 tik 个調卡低 （講「中短調」tik卡輕鬆，講 li̍k 个變調卡食力， 因為愛特別出力去控制聲帶共聲調揤予低），閣像「墨汁 ba̍k-tsiap] 嘛是共款情形。 但是因為即種「低短調」，並無佇一般儂个八音本調內底出現，所以通俗个台語教學冊， 將第八聲个變調解說做是親像第四聲本調共款。其實是有明顯个差別。
我咧教，會共學生講即種通俗見解，嘛會共學生講，其實 -p/-t/-k 第八聲變調了後，是親像第三聲本調遐低，但是卡短，猶原有保留入聲。 抑若 -h 第八聲个變調，著佮第三聲本調攏共款啦（電子儀器來測， 猶是差分分--仔，總是，咱台語儂个耳仔無分）
即種音理，佇台語文界，老實講，有袂少友志無了解。
Comments powered by Disqus.