各位友志，咱明仔載，拜六(2012-09-22) 下晡兩點來試用 Google+ 个視訊會議功能，看用了會順，有合咱即个台語白話字視訊讀冊會个路用無？
咱先來試讀「Sêng-gú chi̍p」（成語集），1928年，台南新樓冊房出版，原稿是 Lîm Siông-hûn 先生佇清朝尾个時就寫个。英國牧師 Liâm Tek-lia̍t 二十年後無意中發現，才共伊出版。真寶貴！
內底有收集文言格言（成語）佮白話俗語，攏唸台語，伊彼[he]文言格言，大部份攏出自「昔時賢文」。古早个台語儂，無排斥文言个心，嘛共伊提來應用佇生活中。若是白話俗語，即本冊也有收集著足濟精彩个話語，咱早就袂曉講囉。
親像第一句 "Phō bâ bōe kā chhú, ah ke m̄ chiâⁿ pū."（抱貓袂咬鼠，押雞毋成孵），我干焦知影下半句，袂曉前半句，看著即本冊，才知原來這是兩句押韻个俗語。
本文體例是一條仔一條成語來做解說，計共 111 條，咱隨時會用得停睏，免的確規本讀完。
原文件圖檔，我已經處理做一份 PDF 電子檔（16頁 2.5 MB）。全部白話字，無一字漢字，請掠落來，對頭序開始先讀--幾頁，才袂到時唸甲 li-li-lak-lak :P
明仔載欲參加「試用會」个先進，請留言予我知影恁佇 Google+ 个 用戶名，明仔下晡兩點請上線連去 Google+，我會將恁加入視訊會議中。
無口座个儂，請去 Google+ 申請一个，免費使用。另外愛tshuân網路攝影機、耳機 Mài-kuh 即寡 sńg視訊該有个設備。對即方面个電腦操作外行个先進，請慢且參加即擺个試用會，等阮試了無問題，才閣共恁報告。
(2012-09-24 facebook)
Comments powered by Disqus.