台語虛詞「了」用法

華語「及物動詞 + 了 + 名詞受詞」台語通常只要講「及物動詞 + 名詞受詞」就好，免加迄个「了」，聽話者會使照前後話意來判斷是毋是指完成狀態。像〔一口氣吃了三碗〕，台語只要講「一睏食三碗」就好，毋通講「一睏食了[liáu]三碗」。

有時台語會使佇動詞頭前加「有」，像華語〔他最後說了一句話〕，台語「伊最後有講一句話」，毋通講「伊最後講了[liáu]一句話」。

台語拄著=仔（偶爾）有用著「及物動詞 + 了 + 名詞受詞」个句式，彼往往有「白了、損失、浪費」个含意，像「交官窮[kîng]，交鬼死，交牛販[gû-huàn]食了米」（俗語）、「費了真濟心神」。也有少數情形是欲特別強調「了結」个含意，像俗語「過了身，煞了代」（Kuè liáu sin, suah liáu tāi）。

請注意，台語另外有「動詞 + 了 + 結果補語」个句式，即種就真捷用著，像「伊做了無好」、「汝講了有準」、「我看了真佮意」。即種台語句法个「了」，對應个華語虛詞有時是用〔得〕，像〔他做得不好〕、〔你講得很準〕，有時猶原用輕聲〔了〕，像〔我看了很喜歡〕。