題目：微笑[bî-tshiò]
儂个面腔[bīn-tshiunn]會凍顯出千變萬化个表情。這一方面當然是咱家治身心狀態[tsōng-thài]个自然反應。另外一方面，也是咱欲佮別儂交陪，來滿足群居生活，蓋重要个一種溝通[koo-thong]機能。若就後壁即種觀點來看，各種表情內底，微笑，通[thang]講是無論男大女幼[lâm-tuā-lú-iù]，攏真受儂歡迎、效果好、誠[tsiânn]妥當个一種互動方式。古早儂講，兇拳不打笑面[hiong-kûn put tánn tshiàu-biān]，著是按呢。
不而過，微笑，實在毋是孤一種个表情，伊是總稱。先有「笑」即一大類个表情，「笑」个內底，才閣有「微笑」即類，微笑又閣包含種種濟濟、講袂盡个情緒[tsîng-sū/sû]佮動機在內。簡單閣具體來講，「微」是小可仔个意思，「微笑」著是小可仔笑，毋是笑甲喙仔裂獅獅[li̍h-sai-sai]、毋是大bú聲笑甲hah-hah叫。
親像保守个舊觀念，認為查某儂著愛大段[tāi-tuān]，快樂个時，呅[bún]--一下著好，毋通笑甲予儂看著嚨喉鐘仔[nâ-âu-tsing-á]。按呢，明明是足愛笑，煞為著社會个眼光，勉強去控制外表个微笑，當然著佮自然个微笑差大碼[tuā-bé]囉。
也有一款微笑，是家治實在無高興[kau-hìng]，但是逐家咧歡喜，干焦咱一支面仔tuh-tuh，無綴儂笑，驚見[kiann-kìnn]失儂禮，只好嘛著喙角小可仔翹峘[kuân]--一下。像俗語講，「鬱鬱在心底，笑笑陪儂禮」[ut-ut tsāi sim-té, tshiò-tshiò puê lâng lé]，這攏是無tāi-uâ个微笑。
若欲愛上蓋天真个微笑，佇幼囡仔[iù-gín-á]个面--ê上捷看見。怹啥乜人情世事攏iá袂曉--得，純然無心機，自然真面目。若閣卡大漢--淡薄，有自尊、知見笑、會愛媠、畏儂嫌、驚儂罵矣，親像儂欲共伊翕像，即陣著會看著怹面對鏡頭个時，nà-nng袂自在个微笑。
儂閣青春勇壯个時，皮膚金滑、筋肉軟韌[nńg-jūn]，著準無表情，甚至gîn-ònn-ònn，只要伊有夠媠，有夠嫣[ian], 嘛會予儂意愛，呵咾伊真殺khuì，有型。一旦有歲，皮肉mooh-mooh liap-liap，喙角一日一日垂[suî]--落去，著準其實伊真平靜，看起來嘛袂輸咧khí-mooh=䆀[bái]，予儂毋敢親近--伊，嫌伊糟老[tsau-lāu]。
按呢，咱著愛不時保持古錐个微笑，勿[mài]予無情个歲月，共咱拖磨做一个老連回[lāu-liân-huê]。論真，這究竟个目的，毋是欲巴結別儂，是為著家治好。雖然照講是先有好心情，才有好笑容，但是咱佇平素時，無論是佇儂群中，抑是家治一儂，攏會使定定有意予喙角笑笑，對遮開始，收下頦[ē-hâi]，放鬆面肉佮肩頭，身軀坐予四正，龍骨騰[thîng]--起來，尻川頭放軟落去，按呢調整外在个儀態、姿勢，予血氣通敨[hueh-khì thong-tháu]，著會倒轉來改善咱內在个精神佮心情，予身心攏得著安穩。
暗時倒佇眠床，若想東想西、睏袂落眠，即陣嘛會使笑笑，放鬆面部个神經，輕輕仔拖長一出一入个喘氣，沓沓仔[ta̍uh-ta̍uh-á]靜心，將一寡操煩卸[sià]落暝昏[mê-hng]个大海。
有一款微笑，是佇困苦个環境、艱難个遭遇[tso-gū]當中，毋肯落志[lok-tsì]，甘願度苦過頓[kuè-tǹg]，望欲[bāng-beh]後日出頭天，毋過毋是喙齒根咬絚[ân]來佮環境硬拄硬[ngē-tú-ngē]，顛倒是微笑面對，用柔軟心[jiû-luán-sim]來堅強家治个捙拚氣[tshia-piànn-khuì]。
像我欲寫即篇命題作文「微笑」遮爾簡單个代誌來講，煞發現家治對儂个觀察、了解實在真粗淺，寫袂出啥乜好物件，感覺真為難，總是，笑笑--仔，坐落來，罔想罔寫，到遮字數也差不多，拗蠻仔算有成[tsiânn]做一篇，通[thang]好交卷[kau-kǹg]矣。
註：nà-nng，敢哪台南卡有咧講，意思相當華語「靦覥、扭捏」。
Comments powered by Disqus.