台語錯字vs.台語正字舉例

倒爿是錯字，正爿是正字

阿嬤 -> 阿媽 [a-má]
雞婆 -> 家婆 [ke-pô]
客兄 -> 契兄 [khè/khuè-hiann]
抓狂 -> 掠狂 [lia̍h-kông]
柑仔店 -> 𥴊仔店 [kám-á-tiàm] （𥴊仔、柑仔聲調無仝）

說明：

「阿媽 a-má」台語自古攏按呢寫，來表示 grandmother。北京話文个勢力入來了後，因為怹用「媽」來表示 mother。毋捌台語字个台語儂才將「阿媽」寫做「阿嬤」。以早咧講老母，無論「面稱」抑是「背稱」，閩台語攏無用著 ma/mah 即種音。台灣佇戰後學北京話，叫 ma-ma / má-á / má-mah

現時我个做法，寫「媽媽」（抑是用羅馬字）是指受北京話影響个老母稱呼，寫「阿媽」是指 grandma，因為自古攏是用即字，包括神明名稱「媽祖、大媽、二媽……」个「媽 má」嘛是對 grandma 个意義引申做女神崇拜。

「家婆 ke-pô」就是管家婆，引申意思是真雜插[tsa̍p-tshap]，加管閒事。寫「雞婆」意思袂通，音嘛無合。按怎講音無合，這愛做方言比較，若漳州腔是有合，但是泉州腔就無合，因為泉州腔嘛講 ke-pô，問題是泉州腔个「雞」是唸做 kue，毋是 ke。可見 ke-pô 絕對毋是「雞婆」。

「契兄 khè/khuè-hiann」就是「結拜兄」。「結拜」袂輸咧「扑契約」共款，約束彼此个關係。漳腔講 khè-hiann，泉腔講 khuè-hiann，完全符合「契」字佇兩種腔口个呼音。若寫做「客」，因為無論漳、泉，「客」攏講 kheh，按呢無合泉腔講 khuè-hiann 个發音。

「掠狂 lia̍h-kông」，毋是「抓狂」。若寫做「抓狂」，台語愛唸做 jiàu-kông，但是台語無即種講法。

「掠狂」嘛有儂講「夯狂 giâ-kông」。

「𥴊仔店 kàm-á-tiàm」，毋捌字个儂烏白寫做「柑仔店」，發音無共款，意思嘛無通。「柑仔」个「柑」是第一聲，出現佇頭前，愛變調做第七聲。但是「𥴊仔店」个「𥴊 kám」，是第二聲，變調做第一聲，聲調才有符合。「𥴊仔」是扁扁圓圓淺淺个竹篾仔[tik-bi̍h-á]容器，內底貯南北貨，排佇店頭咧賣，所以才叫做「𥴊仔店」。「𥴊仔店」佮「柑仔」無tī-tāi。

「𥴊」是「上竹下敢」。電腦顯示袂出个儂，請安裝 hanazon 字型。點連結 https://osdn.net/dl/hanazono-font/hanazono-20170904.zip
掠落來、解壓縮，將內底兩个 .ttf 字型檔，拖入去「控制台->字型」內底。才重開瀏覽器來看。

2023-05-17註：hanazono 字型个連結我有更新到 20170904 上新版。 目前已經有幾若套完全支援教育部台語推薦漢字个字型矣。佇遮無詳細講。