本文
毋但有一位台語前輩提起講：台語 a-má（正字「阿媽」，毋是「阿嬤」），是叫真正親儂个阿媽，包含咱老爸个老母是內媽[lāi-má]，咱老母个老母是外媽[guā-má]，即兩種至親，咱當面攏著叫阿媽，除了這以外，對外儂，無應該叫阿媽，著叫「阿婆」才著。
像前輩所講，傳統用法，阿媽是叫親儂，阿婆是叫外儂，阿公是叫親儂，老阿伯是叫外儂。但是社會結構、人際關係會變化，語言个用法也會變化。
像布袋戲大師李天祿晚年个時，時常佮侯孝賢導演怹合作，電影內伊演阿公，無扑片个時，劇組个儂，逐家猶原攏叫李大師「阿公」，伊也足歡喜接受，袂講「按呢無照古例，我毋是恁阿公」。
現代社會人際關係疏離，顛倒愛佇語言上表現特別个親密，來維持儂个互動。所以病院个護士嘛攏足慣勢叫有歲个婦人儂患者「阿媽」，予病儂感覺親切。（若是六十外个，感覺叫阿媽傷老，就會叫 a-sáng）。
所以朱立倫、宋楚瑜欲「證明」伊有夠親民，自然就會講〔我去淡水拜拜的時候，一個『阿媽共我講，汝一定愛出來選，……』」、〔『阿媽』每天在賣十塊錢的便當，…〕。
叫外口个老大儂「阿公、阿媽」已經變成當今社會佮儂盤撋[puânn-nuá]个外交辭令，若毋是誠心誠意咧叫，就是假仙假觸[tak]、假盡情。總--是，當親儂个面，就毋通閣叫外儂阿媽，無，也著佇「阿媽」个頭前加一个修飾語，看是用儂名、地名、其他啥乜特徵來修飾，叫「○○阿媽、○○má」按呢才袂親疏不分。
面冊網誌留言
陳献琛
細漢時，是叫家己的親儂叫阿媽，熟識的叫阿婆。毋閣目前兮儂看著熟識兮攏教囡仔叫阿媽。
潘科元
按呢無錯 😊
Yujun Yang
我毋是前輩，毋過我嘛感覺叫別人阿嬤足礙虐。
廖淑鳳
稱呼仔稱呼，叫人阿媽，阿公哪有啥要緊，莫叫做”公仔媽”就好。
潘科元
出外叫外儂阿媽，是無啥大要緊，總--是，有親儂在場个時，就對親儂袂得過。
廖淑鳳
會使加上姓，名字，地名，特徵等，足以辨別身份的語詞。親像：淡水阿媽
潘科元
即步讚，iá是淑鳳姊較貼心。 😊
廖淑鳳
叫人阿婆(pô)歹聽無禮貌，因為現老十歲，阮攏講尾音衝懸的第九調~阿婆(pő)，感覺khah少年。
潘科元
毋是阿婆歹聽，是現代儂愛少年。較早是以老[nó͘]為尊。
廖淑鳳
彼个古早，未免siuⁿ古早囉！阮自做囡仔，序大人就教阮ài kā厝邊兜ê「阿婆（pŏ）」相借問，我若是穿kah抐哩抐袚（lā-lí-lā-phoa̍h），行路趖趖，阮阿母就講：你是阿婆（a-pô）喔！
潘科元
阮阿媽過身，後來有一位阿婆來佮阮阿公做伴，阮序細攏叫伊「阿婆=ā」，這並無共伊叫老--去，是尊存迄位過往个阿媽。
廖淑鳳
你講ê情形佮我講--ê無仝，我所講--ê是「做老母--ê」教囝，按怎稱呼無血緣關係ê長輩，對長輩ê尊敬隨人有一步，老人向望少年，所以用尾音衝懸ê語音來叫，親像「阿公」是叫家己ê阿公，別人ê阿公是「阿kŏng」（面稱）。
Tiunn Siok-tsing
廖淑鳳 我以早也是按呢叫 [阿婆~] (尾音牽懸),
但是別人个阿公,會叫伯公抑是叔公,袂叫阿公~
即馬我攏直接叫阿公;阿媽…較親切的款.
廖淑鳳
阮兜ê家教是按呢：有親情關係ê叔公，伯公，丈公攏愛照親屬關係來叫，無親情關係ê厝邊兜，熟似--ê，為著親切，搝倚互相ê距離，就以家己ê阿公阿媽為基準，叔公，伯公提來叫，若是簡單叫，就是(尾音牽懸)ê阿公（kŏng）。魚食流水，人食喙水。
Tiunn Siok-tsing
佇庄跤,喙水若bai2 , 毋若囡仔無人緣,連序大人攏會hong7講話.
我細漢,佇庄內看著參阿媽差不多款个著叫阿婆,參阿公差不多著叫叔公,怹會問: 汝啥人个囝? 了後著會共我講愛叫伊啥!
潘科元
a-pő 有聽過，若 a-kőng 就無聽過，凡勢仔這是客儂來个習慣 🙂
潘科元
咱个語言風俗，毋免問「好」，但是著叫出「稱謂」，按呢長輩就感覺汝有禮貌。
廖淑鳳
中部地區chiok普遍ê用法。我問蹛太平ê同事，伊嘛有講a-pő，a-kőng ，你會使得做語言調查
Hâu Sìn-lâm
阮攏教囡仔叫 ：婆「po3 」婆「po5」。
林良憲
客語攏是叫阿婆，無分?
廖淑鳳
客語有幾若種，各地毋是全然仝款，親像阮外媽彼爿是「大埔客」，叫阿媽是「阿奶（a-né）」，阿公是「阿tah」，毋通誤會，阮阿公頭殼無「a-tah-a-tah」。附帶說明，阿母是「a-mĕ」（音如台語ê阿妹（mĕ）），真細漢ê時陣，我bat分袂清楚，阿母是咧叫外媽，抑是咧叫我。哈哈
Yoan Christo
印尼客語共阿兄个某（嫂仔）號做me-me? 台灣有按呢稱呼無？
劉惠蓉
惠蓉佇社區關懷站服務 的時，嘛是用美雲阿媽 、惜媽……無 ，就是稱呼某物姆仔 ，in攏歡喜 ，就是無愛人共叫婆 ！^^
白麗芬
若是半老老（ló-lāu）就在人叫囉，親像護士攏叫我＂阿姨＂，叫阮總ê＂大哥＂==#
潘科元
汝真不平--hōnn？ :v
白麗芬
潘老師了解我！
Chongle Chhua
Tsiânn頇顢講話, 毋就ài叫「姊姊」抑是「妹妹」才著.
蕭平治
我無愛隨便hō͘人叫我「阿公」，因為阿公、阿媽是阮孫ê阿公、阿媽。直屬阿爸、阿母ê阿爸、阿母是阿公阿媽，若是叔伯關係，to̍h是伯公伯婆/姆婆、叔公嬸婆。家己ê姪孫輩叫伯公伯婆/姆婆、叔公嬸婆，kap人無血緣ê晚輩卻是叫阿公阿媽，敢m̄是tsiâⁿ奇怪。莫怪現此時ê社會，kan-nā tshun阿公阿媽，伯公伯婆/姆婆、叔公嬸婆攏m̄知拍毋見tó位去？
Vito Chang
我見若拄著年歲較大淡薄的女性，叫「阿姨」、「姊仔」，毋捌袂予人反白睚過。
P.S.按呢，我應當無算小鄙臉吧？！^^
潘科元
siáu-phí-lián 應該是「小氣鬼」个意思。
Vito Chang
按呢，我毋是囉！
（潘科元老師，我頂仔彼句，應該用啥較合？）（略略仔去共詼的感覺？！）
另外，愛先共你講一聲「新年快樂」。
蕭平治
較親ê血親、姻親稱呼，實在m̄-thang烏白叫。
韓滿
叫外人阿公 阿媽表示親切 !
陳恩德
卡早讀國校仔，學校外口有蜀个阿婆抽獎，無塊講彼號做阿媽抽獎；抾回收个阿婆，嘛無塊講抾回收个阿媽。北仔話定定塊省乜『張爸爸、李媽媽』，我想啦呼，稱呼外儂做阿媽个情形着是去予too7着个。閣有袂少儂有錯誤个認知，講「阿媽」本來着會使稱呼生份儂，因為ma2是愛寫嬤，嬤着是年老婦人儂个意思，所以報紙定定省乜「嬤賴門口吃便當不走」講曷有按呢用个…
許嘉勇
too7 → too3？
張阿天
有人共伊講『汝看、汝个老母佮汝个兄弟箸外面卜尋汝。』耶穌應答因講、『省乜人是我个老母。省乜人是我个兄弟。』伊就対靴个坐箸伊周圍个人看一輾、講『恁看、隻个就是我个老母佮我个兄弟。』 〔紅皮聖経馬可福建第三章〕
林文信
有一遍阮老爸蹛台北長庚病院，無管佗一護士便入病房便阿公長阿公短，拍算是護理學校教育的款，閣一遍是蹛阮羅東的病院，護士都攏叫阿公仔，可能是時勢無仝矣，往過阮若叫懸二輩的生份儂查埔叫阿公仔，查某叫阿婆仔，懸一輩的生份儂叫o-ji-sang2，o-ba-sang2，若是朋友的老母叫阿姨仔，老爸叫阿伯仔或阿叔仔
劉建仁
我遮的習慣嘛是按呢。tsim2-ma2 亂亂去--囉。是好，抑是䆀?
林文信
這款稱呼文化轉變，應該是受華語稱呼文化的影響，怹若過家連回不時嘛張媽媽、李爸爸，或張奶奶李爺爺按爾叫!今亦有叫北鼻!我想毋是好抑䆀的問題，是心肝會礙虐抑袂的問題，橫直我是無才調喊出喙
Yoan Christo
即種佇台灣才有咧按爾叫， 佇印尼，汝若共儂称呼阿媽，汝會予儂誤會亂認儂， 會見笑矣。 阮共外儂有年歲仔个老儂號做阿婆仔
Ankhue Tan
老奶奶 阮是叫阿姆
古納萬
我對外人的稱呼：
與祖母同歲聲的：阿婆
比媽媽老淡薄的：阿姆
與媽媽同歲聲的 ：阿姨
Comments powered by Disqus.