台語「盤 puânn」佮「𥐵 phiat」

台語貯菜个「盤 puânn」有講做「phiat」，教育部用字是「𥐵」（左石+右匹）。phiat 並毋是一四界个台語儂攏有講，若是泉腔較重个地區可能就干焦有講「盤」，無講「phiat」。若是有講「盤」也有講 phiat 个台灣地頭，往往意義有分化，認為「phiat-á」是較淺个「盤」。

有先進認為台語即个 phiat 是對英語 plate 來个，咱看英語是 pl- 雙子音起頭，若正實是對 plate 變做台語个 phiat，是按怎干焦取無聲子音 p-，煞無取有聲子音 l-？這真有疑問。除非有較有力个證據，若無，咱毋通傷緊斷定台語个 phiat 就是英語 plate 來个。

即个 phiat，其實佇 1873 年个廈英大辭典就有收，照伊个體例，若一个詞條無特別注明使用地區，按呢就表示佇廈門有咧用。不過，伊有另外注明，佇同安是講第八聲个「phia̍t」，佇泉州是講「盤」。phiat，伊个解說是：an earthen plate（磁仔盤）; a plateful（一phiat，做量詞）。

雖然伊是用英文 plate 來解說，毋過這無表示就是廈門話吸收英文 plate 所來个外來語，若是外來語，通常廈英典攏會講明。佇迄个年代，若是對英文吸收來个外來語，廈英典个作者英國儂 Douglas 牧師應該有清楚才著。

盤[puânn] 是上通用个，閩南、台灣一四界攏有講，若是 phiat / phia̍t 範圍較有限。

廈英典有收套語：「四𥐵一碗湯」。四菜一湯个家常料理，比蔣經國个梅花餐較樸素^^