有朋友咧問歌星「陶喆」个「喆」--字台語按怎唸？
「喆」字甘字典（廈門音新字典）有收甲四个音 tsiat / khiat / tiat / tsat，解說攏仝款："gâu, tì-sek, lêng-thong, se̍k-bat."（𠢕、智識、靈通、熟捌）。
其實「喆」只是「哲」个異體字，佮「哲」仝音，唸 tiat 就著，像《彙音妙悟》、《彙集雅俗通十五音》、《彙音寶鑑》，「哲、喆」攏只收 tiat 一音，所以甘字典所收其他个音咱毋免閣傳，較袂傷花。
「哲」个正音是 tiat，俗音是 thiat。即个俗音 thiat 大概是日本時代中後期漸漸形成个，我想是因為「哲」時常用佇「哲學 てつがく」即个日文來个新詞，台灣儂吸收即个詞，煞將 てつ 起頭音个送氣也帶入來台語。日語無聲子音个送氣佮無送氣兩種變體本是互補分配个仝一个音素，若出現佇第一音節是唸送氣，台灣儂唸台語「哲」字就按呢綴咧講送氣个 thiat。
1932 年台日大辭典就有收「哲學」即个日語外來詞，伊標个是正音 tiat-ha̍k。
佛教大居士南懷瑾先生走共產反過來台灣，伊講拄開始聽台灣儂討論問題講著【鐵盒】，毋知是啥，後來才知就是「哲學」。可見當時个台灣儂閣會曉用台語討論學術問題，但是也已經走音，無講 tiat-ha̍k，講 thiat-ha̍k。
日本時代中期出世个台灣儂，慣勢講 thiat-ha̍k，先父就是按呢。我接觸台語學了後，才佇字典看著，「哲」是注 tiat，無注 thiat。閣過幾十年，對即種差異，我才想著自認較好个解說。
tiat 若看無台語音標按怎唸个朋友，請聽<href="http://www.taibun.tw/SoundPlayerAction.do?content=tiat%2Ctiat%2Ctiat" target="_blank">音檔
2016-07-22補充：當時寫即篇个時，柯文哲猶未足出名，後來伊參加競選、當選台北市長。咱聽著怹老母佇電視節目出現，唸著伊个名是「Bûn-thiat」，這也是佮阮爸爸唸个仝款。
Comments powered by Disqus.