查某毋通「討契兄 thó khè/khuè-hiann」；查埔毋通「鬥伙計 tàu hué/hé-kì」。（「計」唸白話音，佮「記」仝音）。
老查埔配少年查某，叫做「老牛食幼菅筍」[lāu-gû tsia̍h iù-kuann-sún]； 查某【倒貼小白臉】，叫做「搧緣投 siàn iân-tâu」、「設緣投 siat iân-tâu」、「飼金魚 tshī kim-hî」。
「契兄」本來只是「義兄」个意思；「伙計」本來是店頭倩个員工个意思，閣一種原意，是「共同出資个股東」，「鬥伙計」本來是指「佮儂做伙整本、投資」。「契兄」、「伙記」後來借用來婉轉表示「情夫」、「情婦」，講久了後，失去原意，一聽就感覺歹聽，攏是咧指無合禮法个男女對象。
「契兄」，現時社會上卡捷寫做「客兄」，汝个台語若是保留真濟泉腔个成分，而且汝是講 kheh-hiann，按呢寫「客兄」，字面解說做「儂客兄」，這就卡無問題，但是汝若是講 khuè-hiann，按呢只有寫做「契兄」才會通。
佇現代社會，自由開放、互相尊重，只要合法、勿欺騙儂个感情就好。遮个舊講法，雖然佇修辭上真高明，但是變成慣用語了後，予聽个儂感覺真受辱。咱个台語應當加一寡綴會著時代精神个新講法才好。
咱這是學術研究，以上个話，知影就好，請毋通隨意對儂講，萬不一予儂告，請家治負責，感恩。
我相信逐種語言，攏有類似即種話。愈「文明」个所在，文化愈複雜，有惡意个儂顛倒愈濟。語言本身無啥乜好意、惡意，是講話个儂先帶有欲 king-thé、phì-siùnn 儂个䆀動機，才予伊講出來个話，帶有迄種意涵。
英語个歹聽話，比台語只有卡濟，無卡少，怹个文法冊甚至用幾粒星來分類歹聽个嚴重性。但是，就規个社會來看，用惡意來講即種話个，普遍个程度到啥款？除了惡意个king-thé，咁有別種卡中性、抑是善意个講法通用，才是咱愛檢討个。
洪錦田先生來賜教：『有人安呢teh講sńg笑,講:老牛食幼kuann筍,老雞母食幼杜蚓(lún)"....講笑講笑....』『語言是萬底深坑,台語閣卡3角6尖,鋩鋩角角,有粗有幼,有暗喻,有明示,..話是在人激=个.看家己按怎運用』。
沈明達先生賜教褒歌：『十條番薯九條臭,一條無臭爛蒂頭,十个契兄九个走,一个無走講轉in兜。』『十莢弓蕉九莢曲(khiau),一莢無曲遐孽siâu,十个伙計死了了，一个無死講煞反梟(hiau)。』
Comments powered by Disqus.