台語「阮」有兩種腔口 guán 佮 gún

進前規个談論過台語第一人稱複數用法个鋩鋩[mê]角角，請參考〈台語个「阮」佮「咱」〉。台語第一人稱複數，有包含對方聽話者（inclusive first person plural），講「咱 lán]，像「咱攏是台灣儂」；無包含聽話者（exclusive first person plural），講「阮 guán/gún」，像「阮[guán]兜蹛[tuà]屏東，恁咧？」以下閣補充說明「阮」个兩種腔口 guán 佮 gún。

「阮」有兩種腔口，講 guán 是漳州腔，講 gún 是泉州腔。因為漳泉濫[Tsiang-tsuân-lām]，兩種講法逐家攏捌聽過。久--來，本來只是腔口个差別，意思、用法攏共款个話，煞有袂少儂感覺 guán 佮 gún 意義、用法無共款。

親像流行歌是對台北市發展出來个，台北市是偏泉腔，講 gún，毋是講 guán。所以早期个流行情歌內底，定定充滿感情咧唱：gún 無愛……，gún 毋甘……。所以著有儂認為講 gún 表示卡sai-nai，亦有儂認為 gún 是歌謠用語。

今仔日閣聽著一種講法：「查某儂才講 gún，查埔儂愛講 guán。」實在真心適。

一方面，咱愛尊重每一儂个語感；一方面，若將即種特別个語感，當做台語普遍个智識咧教學生，無閣下工夫去做文獻研究、田野調查。按呢著毋好。

若是臭奶呆个台灣囡仔、少年儂，定定講做 ún（佮台語「穩」共音），這是錯誤个發音，不可取，應該改過來。若無，台語 g 聲母緊縒慢[kín-tsua̍h-bān]會死了了。

有朋友回應講，教育部台語常用詞典，「阮」所收个台南音，伊註明查埔儂講 guán，查某儂講 gún。我毋知影迄份調查，到底有問過幾个儂，咁有代表性？但是我實在真歹相信講，台南無論老儂囡仔，大大細細，只要查埔儂一律講 guán，只要查某儂一律講 gún，即種台語腔口實在不可思議。向望有台南个朋友來指正、見證，感恩。