2012-04-21拜六下晡，去聽鹿港學者郭忠雄先生演講「鹿港話聲調與漢語音字班」，伊一開始就講足濟真幼个學術細節，但是我看在場个聽眾，恐驚多數連基本个聲韻學術語，像「陰、陽、平、上、去、入」嘛袂曉得，佇遮補充一下。
即種術語，請當做是一種代號，對應「台語八音」个另外一種稱呼爾爾。汝若會曉「呼八音」，按呢就會凍大概掌握。尤其是「陰、陽」，千萬毋通予中國古早儂个聲韻學術語騙去，掠叫是「陰」个聲音一定卡陰柔、「陽」个聲音一定卡陽剛。
台語第一聲到第八聲所對應个另外一種稱呼佮例字：
第一聲（陰平）：東 tong
第二聲（陰上）：董 tóng
第三聲（陰去）：凍 tòng
第四聲（陰入）：督 tok
第五聲（陽平）：同 tông
第六聲（陽上）：動 tǒng
第七聲（陽去）：洞 tōng
第八聲（陽入）：毒 to̍k
第幾聲實際所唸个聲調高低起降，無仝腔口會有出入，所以「第幾聲」是代號、抽象个分類，具體聲調按怎唸，毋是絕對个。毋通看做像音樂个簡譜 1(Do)、2(Re)、3(Mi)... 按呢。鹿港腔个唸法，請先參考洪惟仁教授即份簡單个說明：
http://www.ntcu.edu.tw/tailo/g_in/sound/s_tone5.html
鹿港腔第二聲（陰上）佮第六聲（陽上）分做兩種：陰上唸高降調（有儂唸高平調，兩種並存）；陽上唸中平調。這是伊个重要特色，台灣絕大部份个所在，上聲只有一種，無分陰上、陽上。
但是郭老師所教个鹿港腔已經佮傳統个鹿港漢文先生所教个有出入，伊將第六聲（陽上）佮第七聲（陽去）个「本調」攏唸做中平調，「變調」攏唸做低平調，按呢「動、洞」兩類个字煞完全無分別。這佇台灣優勢腔卻然（固然）是無分別，但是鹿港老輩讀冊儂分甲真清楚。伊煞無分，講是伊「研究」了後个結果。我毋知影伊講个「研究」，是指書面文獻个研究，抑是指實際調查鹿港語音演變个結果？總是，按呢背離鹿港傳統來教鹿港腔个台語漢文，對我即个非常期待聽著古鹿港腔个外地儂來講，難免感覺失望。
本來鹿港腔个聲調系統，陰上、陽上有分，不過陰去、陽去本調仝款，但是變調猶原有分，所以愛算做是八聲調，即種八聲調系統非常寶貴，因為漳腔、廈腔攏是卡簡單个七聲調系統，分袂清楚陰上佮陽上。但是經過郭老師伊按呢「整理」過个鹿港腔，向台灣優勢腔趨過去，變做仝款是七聲調个系統。但是伊即種七聲調鹿港腔，又閣沿用舊底个鹿港腔，第一聲本調、變調無分（攏是中平調），第四聲本調、變調嘛無分（攏是高短調），按呢綜合起來看，伊所提个鹿港腔，煞變做比優勢腔卡簡化个系統，按呢咁好？
若是當地个日常口語，按照當地多數儂个日常講法來教，這真合理；若是卡傳統个學問，應該盡量保持傳統教法。若欲改變傳統，著愛十二萬分个慎重。
總是，鹿港腔真複雜，閣一直咧演變，我毋捌三兩[sann-nn̄g]，講了足淺薄，萬望高明先進，多多指教。
Comments powered by Disqus.