台語 lám-nuā 佮 lām-muā

台語 lám-nuā，教育部辭典寫做「荏懶」，伊解說講【形容人懶惰成性，骯髒邋遢又不梳洗整理】。‎即个詞卡常用，一般儂攏知。但是閣一个台語形容詞，卡粗，講做 lām-muā。兩个詞，音差小可，意思差真遠。

即个詞，是對 lān-muā 來个，前字个韻尾 -n 予後字个聲母 m 同化，才變音做 lām-muā。教育部辭典寫做「𡳞蔓」，伊个解說有兩項【一、(名)男性陰毛。二、(形)皮。形容厚顏無恥、流氓樣、不要臉的樣子。】阮遐个用法，有合教育部辭典第二項个解說。

lān-muā 个本意是「lān（陽物）个 muā」就是查埔个陰毛。即个 muā 本意佮 mua 有相關，是透過聲調變化，來變化意義个強度。mua 佮 muā 本來攏是動詞。mua 是輕輕仔崁[khàm]咧、mooh 咧，像「幔雨幔 mua hōo-mua」是愛講 mua；抑 muā 是 mooh 卡絚、mooh 椆椆，甪[lut]袂啥會起來，像「予蜘蛛絲 muā--著」。因為陰毛是生佇身軀頂，mooh椆椆，所以才講 lān-muā。

進一步探討，是按怎欲用 lān-muā 來形容儂、罵儂，這就是咱个語言文化，tshiâng在慣勢用性器官、性行為、排泄物來罵儂、發洩不滿佮渺視个態度。親像聽儂講著啥，咱反對、看袂起伊个講法，定定應講「lān啦！」、「尻川啦！」、「屎啦！」。所以用 lān-muā 來做形容詞，形容華語講个「痞子」，嘛是會凍理解个。

「𡳞蔓」个「合理用法」，應該是咧罵查埔个大儂。但是阮遐咧用，因為普遍已經毋知影伊个本意，所以嘛有查某儂會講「迄个囡仔真 lān-muā」，囡仔互相之間，愈捷按呢罵來罵去。總是，阮猶是感覺彼是粗魯話，阮佇厝內袂使講。嘛建議讀者當做學術研究，知影就好。