固定低調輕聲佮隨前變調輕聲

有朋友對「固定低調輕聲」佮「隨前變調輕聲」捎無總[sa-bô-tsáng]，佇遮量約說[sueh]一下。

輕聲有兩大特點，第一「卡輕」，著是聲音比正常个聲調卡細聲（響度小）、卡短（長度短），這一般儂靠耳空無一定感受會出來，用儀器量著真明顯。第二卡重要个是失去伊本來聲調个屬性，變成「中性調」(neutral tone)，亦著是講，伊無閣按照本來正常个「本調、變調」个規則去變。

以固定低調輕聲來講，毋管伊本來是第幾聲，只要是固定低調輕聲，一律變做「固定个、低个聲調」，親像：

驚--死 [kiann--sí]
罵--死 [mē--sí]
lòng--死 [lòng--sí]

聽--著 [thiann--tio̍h]
鼻--著 [phīnn--tio̍h]
看--著 [khuànn--tio̍h]

聽--過 [thiann--kuè]
問--過 [mn̄g-kuè]
看--過 [khuànn--kuè]

以上三个輕聲字「死、著、過」，本調分別是第二、第八、第三，結果毋管伊原底聲調个屬性，佇遮攏變做唸固定低調个輕聲，而且伊个頭前字愛讀本調。即陣，毋通掠大誤，叫是「著」佇遮是正常个變調，抑[iah]「過」佇遮是讀本調，毋是按呢。

若是隨前變調輕聲，顧名思義，著是輕聲字卜按怎變，愛綴頭前本調迄字个峘度。可比：

粗=个 [tshoo=ê]
大=个 [tuā=ê]
細=个 [sè=ê]

有感覺出來講以上三例，「个」个聲調峘低，會綴頭前字變化無？正常「个」第五聲，變調是變做中調个（泉州腔變低調），但是佇遮按怎會一時變峘，一時變中調，一時變低調。這著是因為伊失去原本聲調个屬性，變做愛綴頭前本調迄字來變个關係。

有个腔口，像一寡泉州腔，閣有台南腔，無隨前變調輕聲。所以「粗--个、大--个、細--个」迄个「个」，一律是固定低調輕聲。