對詩仙「李白」講起
阮國小个時，上「國語」課，老師教阮唐朝詩人「李白」个姓名 著唸 ㄌㄧˇ ㄅㄛˊ。
到國中了後，國文老師就改唸做 ㄌㄧˇ ㄅㄞˊ 矣。拄才我去查重編教國典， 詩人「李白」也是干焦注即音爾爾。
「白」華語唸 ㄅㄛˊ 是讀音[tho̍k-im]（文言音），唸 ㄅㄞˊ 是語音（白話音）。 讀音、語音即兩个詞，我咧上「國語」課个時完全毋知按怎理解， 想講「讀」出來就是「語」言个音，按呢「讀音」佮「語音」咁毋是同義詞？ 為啥乜分指兩種音？
何謂「讀音」、「語音」？
大漢 家己研究台語了後，才有概念，所謂「讀」主要是「讀文言文」， 文言毋是白話口「語」。仝一字，若讀文言文个時用个音，佮口語咧講个音無仝， 按呢前者就是「讀音」，也叫做「文言音」；後者就是「語音」，也叫做「白話音」。 細漢个時，老師若會曉共阮教「文言音」、「白話音」即對術語，我相信我會較快理解。 因為白話嘛會提文言來用，所以日常口語、白話文當中，也會出現有个字是唸「讀音」 个情形。
仝一个漢字，有讀音、語音兩種唸法，這佇學術上也叫做「文白異讀」，是「一字多音」 个一種類型。
註：「讀音」即个術語，上好唸做 tho̍k-im，毋通唸做 tha̍k-im。「讀」唸 tho̍k 是讀音， 唸 tha̍k 是語音，按呢 tho̍k-im 就是指文言音个同義詞「讀音」；「讀音」若唸 tha̍k-im 只是指看文字讀唸出來个音，看語境來選用文言音抑是白話音。事實咱即馬个應用是白話文為主， 其中多數字攏是讀[tha̍k]白話音爾爾。
華語个文白異讀佇台灣流失个原因佮類型
「國語」佇中國个時，閣有真濟文白異讀（雖然猶是無台語遐濟），到甲台灣， 因為毋是咱个母語，所以逐家學無啥路來，後來就直透簡化去，真濟字攏賰一種音， 可能是保留讀音，也可能是保留語音。當然，猶閣有幾字仔是兩音攏有，看語境。
一、干焦保留讀音：
像「色」佇台灣，我自底學「國語」，干焦聽過一音 ㄙㄜˋ，這是讀音。 「色」个語音 ㄕㄞˇ 台灣無啥儂知，獨獨 ㄕㄞˇ ˙ㄗ 儂儂會曉講， 問題是逐家煞攏寫做「骰子」。
其實「骰子」愛唸 ㄊㄡˊ ˙ㄗ，若講 ㄕㄞˇ ˙ㄗ 著愛寫做「色子」才是正字。 結果寫是寫做「骰子」，講煞講做 ㄕㄞˇ ˙ㄗ，錯亂去矣。即種物件， 台語講 tâu-á，漢字就是「骰仔」，佮【豆仔 tāu-á】聽起來仝音， 其實本調無仝，也無仝字。
「色」个語音唸 ㄕㄞˇ，除了「色子」以外，我見聞有限， 毋捌聽過蹛佇台灣个儂佇別種語境講過，無論本省抑外省儂。 但是我有聽過中國大陸儂講「五顏六ㄕㄞˇ」， 也有聽過來自中國東北地方个老和尚講：「阿彌陀佛的金ㄕㄞˇ世界」。
二、干焦保留語音：
「白」字，日常講話，台灣攏講語音 ㄅㄞˊ，博士博才會刁工唸讀音 ㄅㄛˊ。
咱查重編教國典，「白」字个詞，唸 ㄅㄛˊ 个，差不多攏是生活中用袂著个古文詞彙 （包括四字成語）。干焦「自白、自白書、伊麗莎白時代、伊麗莎白一世」，伊注 ㄅㄛˊ 个音，無注 ㄅㄞˊ，問題是生活中根本無儂按呢講（學究 無算）。
三、讀音、語音攏有：
像「薄」字，讀音ㄅㄛˊ、語音ㄅㄠˊ 攏閣有咧流通（只是後者也漸漸罕用矣）。 較文言个詞，像「輕薄無行」教國典唸 ㄑㄧㄥ ㄅㄛˊ ㄨˊ ㄒㄧㄥˋ； 若是口語「薄薄的一小片」照講是唸 ㄅㄠˊ，不而過可能也有真濟儂攏唸做 ㄅㄛˊ 矣。
以上个例字「色、白、薄」本底攏是古漢語个入聲字，入聲韻佇漢語系就是較無穩定个音， 特別容易形成文白異讀即種多語音層个現象，無論華語、台語攏是按呢。
進一步講，文白異讀大量流失个情形，佇新一代个台語儂喙裡，也是觀察會著， 真濟古早有文白異讀个字，現代台語儂往往干焦賰一種 niâ，可能賰語音， 也可能賰讀音。
結論
文白異讀本質上是漢語系語言个一種歷史包袱，彼算是「勾破音」个一類。 別類个「勾破音」，有个有分辨詞性个功能，有个有分別詞義个功能， 但是「文白異讀」即種一字多音个現象，較無明顯个辨義功能， 是屬佇較微妙个風格差異：文 vs 白；雅 vs 俗 等等， 這對非母語儂來講，真歹掌握。台灣儂學華語，是非母語儂个身份， 抑新一代台灣儂翻頭學台語，也成做一種異化个「非母語儂」， 所以對台語个文白異讀仝款也真頭疼！
補充
重編教國典「色」 有收第三音 ㄕㄜˋ，解說是：「[名詞] 俗稱性慾衝動。」 原來國語流行話〔做色色的事〕个音 愛講做〔做射射的事〕喔！ 😅 🤪
Comments powered by Disqus.