姓「謝」个台語音

「謝」做字姓，台語有儂唸 siā，就是「感謝」个 siā 迄種音；有儂唸 tsiā，系統上屬白話音，佮「食物件」个「食 tsia̍h」仝聲母。

tsiā 个唸法，廈英大辭典(1873)註明是漳州講法，而且干焦用佇字姓，其他个用法攏唸 siā。

但是姓「謝」佇台灣个分佈，台南、高屏講 tsiā，毋過中部、北部、東北部，我觀察著，有袂少偏漳腔个儂嘛是講 siā。

許嘉勇老師提起：『謝長廷是臺北大稻廷打鐵街个人，臺北人較濟是慣勢叫伊「Siā Tiông-tîng」，謝長廷路尾去高雄做市長，高雄人較濟是慣勢叫伊「Tsiā Tióng-tîng」。』

參考教典「謝」方言表。伊無列屏東講法，我是屏東萬丹儂，阮講 tsiā。姓「謝」佇南部講 tsiā 才是鄉親父老較會接受个音，但是中北部就毋是按呢。

初步按呢定位：字音系統上是文白異讀个 siā、tsiā 兩音，用佇字姓，佇廈英典時代个福建，是廈/泉 vs. 漳个差別；佇當今台灣，漸漸變做是北/中 vs. 南个差別。