本文
國共鬥爭，共產黨倒頭贏，伊佇學校內个策反，非常有效、影響重大。蔣家軍輸甲褪褲，走來台灣，才知影愛嚴密控制校園，到今嘛毋肯叫教官退出校園。
天真熱血个學運青年佮教授，單純徛佇維護普世價值佮學生權个立場，支持中國籍學生佇台灣校園个參政權。但是咱若有淡薄仔歷史意識，就愛警醒，滲透校園是共產黨統戰台灣重要事工在內。
淡江大學學生數，全台第二，欲倚三萬儂，只比台灣大學較少。中國儂經營兩三年，一下出手，就佔著淡大學生會長个一組候選人，閣引起台派支持佮反對雙方意見个強烈對立，即款對台校園个工作成果，咁毋是足驚儂？
舊年有一位德國籍个環保青年，只不過佇台灣參加一擺反核，就予國民黨禁止伊閣再入境。對照起來，蔡博藝來台灣就學，深入參與太陽花反服貿運動，反服貿就是反國民黨兼反共產黨，是按怎伊會凍佇兩岸來來去去，伊佮伊个親儂攏無代誌？
咱去 Google「蔡博藝」三字，所出現个結果，全部攏是支持蔡博藝个頁面，包括陳為廷个發言，其他網路頂質疑、反對个聲音攏總無看見，為啥乜？
準做蔡博藝本儂只是一位純潔愛民主个青年，毋是中共直接差派[tshe-phài]來台个職業學生，統戰个烏暗力量到今其實就是一直咧暗助伊。
支持中生參選咱大學學生會長个台灣青年，我再三看著怹个理由包含一點：反正大學學生會長無啥權力、無足輕重[bû tsiok khing-tiōng]，做袂出啥代誌，伊愛選就予伊選，哪有要緊？東森新聞網也講這是〔一個小小的學生會長選舉〕。
所以我愛閣強調：「一名優秀个中國女青年，來到台灣，用合法、溫柔个方式，扑拚三年，就有可能提著三萬台灣大學生个代表權。」即个「1 比 30,000」个現象本身，對中共和平統一台灣大業來講，實在是莫大个鼓舞，這對中共佮對全世界攏有非常重要个象徵意義佇咧。
對中共來講，伊對台灣个工作策略，會對「人海戰術、武力威脅、名義統一」，進化到「菁英戰術、柔性勸化[khuàn-huà]、實際統治」，兩套極端，隨機應變，靈活應用。
對全世界來講，儂看著咱台灣三萬青年學生，予一个中國儂出頭做代表，只要符合形式上个民主程序，攏袂計較，按呢就表示咱个下一代歡喜佮中國儂同齊決定台灣前途，也願意予中國儂做頭來懷柔統治。
就現此時个狀況來看，台灣个大學學生會長，予儂看做只是咧做牛做馬，但是欠缺實權，無足輕重个職務，這是過去長期以來，國民黨政府強力控制校園个結果。
但是面對新局勢，即个當咧積極出賣台灣予中國个國民黨政權，隨時會使配合中生擔任會長，用落實校園自治个名義，修法下放權力予學生會，予伊有權審查校內个學生社團存廢、活動申請、經費分配等等。
學生會猶未搦[la̍k]著大權以前，先由學生會出面來辦理各項活動，爭取提高中生待遇、增進「兩岸」交流、宣揚「和平」統一，攏是目前个制度充份允准个。
一開始是看起來同情台灣民主，但是並無支持台獨个中國學生出來選，閣來，後一屆閣後一屆咧？免兩年久，台灣个大學各自治社團，豬羊變色，全部攏是熱烈支持統一个中國學生出來互相競選个場面，也無儂感覺奇怪矣。
並毋是合法个代誌，咱就無應該異議，凡若會加速台灣被中共併吞个法律，攏是咱愛批判佮警覺个對象。照目前个法規，蔡博藝有權出來選，咱無應該逼伊退選，才袂失去民主風度；但是針對未來，應該趕緊立法限制中國儂在台灣个參政權，包含學生會長參選權。中國儂絕對袂使比照一般个外國儂看待，這毋是歧視，是根據「兩岸」个特殊局勢進行合理政治判斷所做个預防措施。
因為太陽花運動所培養起來，一屑屑仔反中國併吞个意識，免兩下手，就予中籍生參選會長事件化解了了矣。
中共多年來，排飛彈、激歹面威脅台灣，得袂著明顯个功效，今伊了解：「押雞毋成孵」[Ah ke m̄-tsiânn pū]，不如著用「軟索遛大豬」[Nńg-soh liù tuā-tu/ti]。
面冊網誌留言
夏途島
少年人根本傷看輕中國人ㄟ奸詐。
Sky Rainbow
老師个頭腦足清楚！
我會揣機會佮阮「台灣獨立建國行動志工隊」个同志分享即篇文章！
黃淑惠
最大在野黨要廢台獨，當然就有趁虛而入~~
Comments powered by Disqus.