2023-10-16 註記：本文紹介个「軟體機器儂」已經廢用，所有个超連結網址也失效矣。即篇留咧做一个歷史見證。
本文
Luî Bêng-Hàn 佮 Morrison Iunn 兩位𠢕儂，寫出一隻軟體機器儂，透過Facebook開放予儂利用，會曉自動共咱寫个台語文讀出聲，儹著是儹！雖然閣會凍ta̍uh-ta̍uh改進，但是已經比市面上一大堆電腦語音服務厲害太濟咧喇。我看一寡肯寫台文个朋友，攏猶閣毋捌使用過即隻機器儂，感覺誠無彩。即兩工我簡單做一寡試驗，佇遮做一个小報告。
以下為著方便，我將「即隻軟體機器儂」簡稱做「童仔[tông-á]」，因為伊著親像共咱服務个書童[su-tông]共款，咱寫台語文，機器儂書童踮身軀邊伺候，隨時會凍讀出聲，予儂客聽，實在不止享福。但是叫「書童」，無夠古錐，換喙叫做童仔。袂輸是迎鬧熱个時，大頭囡仔面个空殼翁仔，儂愛nǹg入去內底夯咧ûn街迄款童仔[tông-á]。照講號名愛「生」伊个儂才有權利，我卡僭權[tshiàm-kuân]，佇遮共伊个「父母」會失禮。
童仔會曉讀教會羅馬字、台灣羅馬字，閣有漢字寫个台語文。我到tann攏先試台羅个部份。因為教羅、台羅攏一律標調類，無標實調，亦著是一般所講个，標本調，無標變調。予讀者家治判斷去決定tang時欲變抑毋變。
即種判斷个過程對軟體自動讀台文是極大無比[ki̍k tuā bû-pí]个挑戰。其中个道理，簡單講，咱對台語本調佮變調，佇一句話內底，到底是按怎變來變去，干焦有把握講，若是有變，是變做啥乜調。但是這著愛先決定講，到底是毋是愛變？即个是毋是愛變个規則，雖然有蓋濟台語語言學家寫出規則，總是，迄種規則攏猶閣傷抽象，無夠具體明確，會凍做根據來寫出電腦軟體所需要个演算法，通去自動分析千變萬化个台語話句，會凍一音節一音節去斷定[tuàn-tīng]講即个讀本調，迄个讀變調。
所以童仔是按怎做个？引用 Morrison Iunn教授个話：「簡單講，我會先去臆詞類，了後去臆伊愛讀本調抑是變調，有囥一寡rules佇內底。聲音應該會當處理閣較好，總是我毋是語音方面專長，所以阮是1个音節1个音節錄音，了後根據變調演算法判斷欲讀啥物聲調，才real time kā聲音鬥起來送去client。」詳細請參考伊佮儂合寫个一篇論文。
迄篇論文我且共囥咧無讀，想講，先來直接做試驗，寫一寡話句看童仔按怎唸，我才來揣斷[tshuí-tuàn]伊背後个原理，紲落去才看伊个論文來印證我所想个。總是，閣來無欲講傷濟理論，欲共逐家報一寡我試出來个，寫台羅文，使用連字號佮其他標點个撇步，通予童仔會凍共伊唸出卡正確个本變調。
先講基本規則：
一、若是一个確定个詞，像 pâng-king; hué-tshia，寫个時一定愛用單連字號 - 將兩个音節連起來。按呢童仔著知影連字號頭前愛變調。三音節詞、四音節詞等等，只要干焦尾字讀本調，按呢攏共連連起來著是。
二、若是輕聲，親像 sin--ê; kū--ê; peh--khí-lâi; pê--ji̍p-lâi，寫个時愛用雙連字號 -- 表示頭前字唸本調，後壁字唸輕聲。連紲兩字攏輕聲个時，第一个輕聲頭前用雙連字號，第二个輕聲字頭前用單連字號著好。童仔干焦會曉固定kē調輕聲，袂曉隨前變調輕聲。
三、若是其他个標點，親像「Guá sī lāu-su, i sī ha̍k-sing. 」「Lí sī lāu-su, ia̍h sī ha̍k-sing?」。拄著一个音節，伊後壁隨接逗點、句點、問號等等个標點，即个音節童仔著攏唸本調。當然，頂面輕聲个規則優先。
閣來家婆補充一下，英文亦好，台語羅馬字亦好，標點佮頭前个字母中間勿làng格，但是標點後面攏愛làng一个空格（半型个space）。中文標點因為佮一般漢字共款攏是全型字，所以中文標點後壁無咧làng格，但是羅馬字著一定愛。另外，有儂講若是英文拄著句點後壁愛làng兩个空格，彼是古早扑字機時代个舊慣，電腦排版時代，軟體真巧，會自動看款調整，無需要咱儂去ke了工。
以上三點原則佮一般台羅文个正書法共款。紲落去，來講針對童仔个需要，按怎做一寡調整个撇步。
四、若是詞佮詞中間愛有个空格，彼著卡麻煩。頭前提起，童仔會先臆一个詞是啥乜詞類，才決定欲變調無。迄種判斷，有時會tîng-tânn。可比講，空格頭前迄字該變調，伊煞共汝唸本調，這欲處理，上簡單是直接將迄个空格改做單連字號，予前後詞連連做一伙，伊著會唸變調矣。總是，明明毋是共一个詞，咱煞共怹兩个詞連寫做伙，咁毋是真無合理。針對童仔即个能力不足，一个詞咱若希望伊全部變調，會使佇上尾音節後壁加一个單連字號，才閣扑空格，紲落去才閣扑下一个詞。
舉例卡明，「厝一直起 Tshù it-ti̍t khí」，伊唸做 Tshù# it-ti̍t# khí# （井號頭前个音節，表示童仔唸本調），按呢毋著，「直」愛唸變調才著。為著欲予「直」變調，咱會使寫做 Tshù it-ti̍t- khí. 注意 ti̍t- 佮 khí 中央有 làng格，這是因為副詞「一直」無應該佮「起」連寫做伙。
五、但是，按呢「直」正確矣，「厝」閣毋著去矣，煞唸變調。即種佇空格頭前个音節，應該唸本調，伊煞變調个情形，著加扑一个下底線 _ 加佇迄个音節後壁，著會使逼伊一定愛唸本調，像按呢 Tshù_ it-ti̍t- khí. 注意迄个下底線 _ 後壁閣有一个空格，予主詞 tshù 佮副詞 it-ti̍t 做合理个拆開。
按呢處理過，著會使予即个閣咧發育个童仔，唸出一篇台文每一音節本、變調差不多完全正確个台羅文，雖然會加出一寡礙目个記號。
閣舉一組心適个例。咱欲講台灣个大學一直起，愛寫 Tâi-uân_ tāi-ha̍k_ it-ti̍t- khí. 童仔著知影通唸講 Tâi-uân# tāi-ha̍k# it-ti̍t khí#. 若是欲講台北公館迄間台灣大學一直起，愛寫 Tâi-uân-tāi-ha̍k_ it-ti̍t- khí. 按呢伊著知通唸做 Tâi-uân-tāi-ha̍k# it-ti̍t khí#.
即馬將以上舉个例全部列佇下跤：
pâng-king; hué-tshia.
sin--ê; kū--ê.
peh--khí-lâi.
pê--ji̍p-lâi.
Guá sī lāu-su, i sī ha̍k-sing.
Lí sī lāu-su; ia̍h sī ha̍k-sing?
Tshù_ it-ti̍t- khí.
Tâi-uân_ tāi-ha̍k_ it-ti̍t- khí.
Tâi-uân-tāi-ha̍k_ it-ti̍t- khí.
請聽童仔唸汝聽。
從中，有真濟口八聲（收 -p/-t/-k 韻尾个第八聲）个字，出現佇變調抑是輕聲，照講伊个變調愛變kē調。但是童仔个設計，所根據个是卡通俗个台語變調理論－－認為第八聲佮第四聲互變，所以是直接將第四聲本調个呼音（中調）提來當做第八聲个變調使用。按呢童仔唸出來，佇遮个所在，聲調著無夠kē。這愛蓋斟酌聽，才聽會出來。另外，有一寡個別个字，錄音抑是存檔處理了走精去个，著無閣提起。
本底想欲簡單寫，無疑寫一堆，真歹勢。若有毋著，才拜託雷、楊兩位se̋n-sé，抑是列位se̋n-pái共我牽教，感恩。總是，向望我即篇，會凍鼓舞閣卡濟友志來利用童仔。我咧想，濟儂使用，濟儂回響建議，童仔个父母才卡有動力，繼續來共童仔tshiânn-tî予伊大漢。怹兩儂閣有其他先進，為咱台灣語文資訊化濟濟種種个tio̍h-buâ佮貢獻，佇遮欲共怹讚嘆致敬。
面冊網誌留言
潘科元：
台語機器儂个網址，猶未試過个，緊來sńg！
http://apps.facebook.com/ke-khi-lang/tau-sann-kang.php?ref=share&count=0
好聽，但是小可會跳針（聲調本變調有時無準），只要照我个撇步去寫，著會大大改善。安呢嘛會凍順紲訓練家治對本變調个音感，一兼二顧。
Morrison Iûnn：
會讀台羅全然是Luî Bêng-Hàn ê功勞，這个系統做出來ê時，台羅猶未出現，是 Bêng-Hàn寫轉換ê家私，數字、調符攏會當食。
Supahmasike Leaau：
Daiqivunw gorh giannrib zidle sinf’e kamzamv a 🙂
Gamsiaf lngwi senbaiz e hucuds!
Lûi Bêng-Hàn：
góa kám-kak siōng tōa ê būn-tê tō sī server ti̍t-ti̍t sí--khì. Èng-kai lâi kā i poaⁿ-chhù.
Morrison Iûnn：
Gún thâu-ke hia ê si̍t-giām-sek sī kiâⁿ Bioinfo ê, in su-iàu tāi-liōng ê ūn-soàn, só͘-í siaⁿ-im Server chí-hó khǹg tī khah kū ê tiān-náu.
Goá hiòng ha̍k-hāu sin-chhéng ê kè-e̍k í-keng khak-tēng thong-kè, choè-kūn ē boé sin ê ki-khì, hi-bōng kàu-sî ē-tàng kái-koat chit ê būn-toê.
Morrison Iûnn：
Ji̍p-siaⁿ ê piàn-tiāu, khak-si̍t sī iōng khah kán-tan ê hong-hoat. Goá khoàⁿ Kang Éng-chìn chò chit pō͘-hūn, in ji̍p-siaⁿ tō ū lo̍k 3 ê bô kâng koân-tō͘ ê im.
Chit ê pō͘-hūn í-āu ē-tàng khó-lū lâi kái-chìn.
Lûi Bêng-Hàn：
m̄-koh lo̍k-im sī siōng hùi-khì ê 1-pō͘.
潘科元：
除了一音一音分開錄才合成，目前漢語系自動語音咁有做出別種卡先進个技術？
Comments powered by Disqus.