翕熱个禮拜日下晡，我咧讀白話字新約聖經 Ko-lîm-to Jîn Su, Chiân Su（哥林多人書，前書）。無偌久，開始落雨、愈落愈大，涼風陣陣[tsūn-tsūn] 吹入客廳。我讀兩章了後，袂堪得愛睏神引誘[ín-iú]，就關電火，佇膨椅頂眯[bî]--一下。
天頂繼續siàng大雨，我睏到一半，感覺各樣[koh-iūnn]，起來看，才發現客廳天篷[thian-pông]个必巡[pit-sûn] 漏水 tsha̍p-tsha̍p滴，落地窗入來遐个粗家私[tshoo-ke-si]有徙[suá]位過，閣加一liâu膨椅面个椅馬仔，頂面貼一張有淋[lâm]著水个字條仔，才知是隔壁个 oo-jí-sáng 好心替我對外口搬入來，免得予雨沃害去。
一面煩惱[ló]、一面動手收拾。雄雄兩三个細漢囡仔喙笑目笑、嘻嘻譁譁[hi-hi# huā-huā]，頭面、身軀搭倚[uá]佇客廳个蠓仔門遐，掠我金金看。我無啥會認得--怹，閣來有一陣[tīn]大儂佇怹尾後來，原來是我个表兄姊，怹對南部載阮爸母起來，無先共我講，就直接過來看我。
我哪共怹招呼，哪繼續款客廳，怹逐个汝一句、我一句，鬧熱做一時。阮爸爸表情平和，坐佇遐，敢哪有講話、也敢哪無，就準有講話，也予眾儂个聲音崁[khàm]過，聽袂現。
媽媽有講幾若句話，猶原是永常時關心我出外生活个話語。
無偌久，傳來樓跤妹妹[me-me]練琴个聲音，我斟酌kā聽，是〔掀起了妳底蓋頭來，讓我來看看妳底眉，妳底眉兒……〕。我來遮稅厝徛[suè-tshù-khiā]，得欲十冬，妹妹差不多逐工攏咧彈伊个「小蜜蜂變奏曲」，哪彈哪咧咿咿呵呵[i-i# o-o]唱伊家己編作个歌詞，不止快樂。
最近怹媽媽敢哪有倩一位新个音樂老師來厝裡教伊，伊總算有新个鋼琴曲好學囉！毋但按呢，伊閣另外咧學塗嗶垺[thôo-pi-pu]，真緊就學會曉歕[pûn]幾若條台語、華語佮西洋出名个歌謠。
我是一个音癡，頂日仔 拄開始 煞掠叫樓跤有儂咧呼噓仔[khoo-si-á]，透早透暗仝款迄幾條歌 khoo 袂煞，利利[lāi-lāi]个聲，愈聽愈臊耳慒心[tshò-hīnn tso-sim]，我強欲擋袂椆，欲傱[tsông]落去共伊喝恬[huah-tiām]。後--來，才看著是迄个妹妹咧歕塗嗶垺。
伊是一个唐氏症个囡仔，成[tsiânn]十年來，面貌、漢草無啥變，聽講已經過二十歲矣。
我哪聽伊个琴聲，哪咧想講欲將遮个寫落來。目睭褫[thí]開，發現家己閣倒佇睏房个眠床頂。客廳並無漏雨，也無親儂來看我。阮爸爸也已經過往七冬矣。
Comments powered by Disqus.