感謝恁

阮个學生真chut4-tioh4。對外到內，無論相貌、個性、才華、能力各方面，攏予儂呵咾甲會tak4-cih8。看姻實際个表現，閣再加上姻佇個人網誌寫个文字，任何儂攏會深深感動。

姻拄讀大一nia5，早著有定著(tiann7-tioh8)个理想，閣有追求理想个決心。一直積極(cik4-kik8)行動，一直自我鼓舞，嘛互相鼓舞。

一个班，會凍有遮爾儕好學生集倚(ua2)來，予我有機會熟視(sik8-sai7)姻，這是洪老師个牽抾(khioh4)，亦是我个福報。毋閣，我無資格徛佇老師个立場，學孟子講「得天下英才而教之，一樂也」即種話。

隨順因緣，有可能過無外久，我會結束佮姻正式个師生關係。毋閣，我一定會將姻予我个感動佮啟示，永遠囥踮心肝底，會記得愛像姻按呢，永遠毋通扑毋見(phah4-m7-kinn3)追求理想个勇氣。

一步一跤印，我會先將錢先生《中國文學論叢》即本冊讀完，有卜寫啥才閣來遮。對即本冊開始，一本過一本，將我想卜讀个冊讀完。