民進黨總統初選，干那靠「對比式全民調[tiāu]」來決定欲派啥儂出來。即个「對比式」全民調，設計了足蹊蹺[khi-khiau]，無了解伊个鋩角[mê-kak]个朋友，請參考〈民進黨支持者不能不知道的總統初選眉角〉。
是按怎欲按呢創？講是一方面，勿[mài]予初選个競爭者直接相拚（講若採取「互比式民調」，著卡會發生即款情形）；一方面閣欲予初選民調，直接來反映實際大選个得票率，予上有可能戰贏馬英九个儂出頭。「對比式全民調」，毋是民進黨候選人之間直接互比，是隨儂去佮馬英九比，我批評怹是關心掌權，大過關心台灣，真正个賢能者僫出頭。
分析起來，用「對比式全民調」，佇綠軍選民內底，支持度卡低个蘇，對伊顛倒卡有利。所以，關係迄陣[tsūn]欲決定即種辦法，有一个可能性真大个「陰謀論」。著是講，民進黨內卡輸面个競爭者（但是猶原足有勢力），用心計較，運動伊迄派个儂（拆白[thiah-pe̍h]講，著是蘇系），入場左右初選辦法个決策。蔡主席因為嘛欲出來選，歹勢主導[tō]初選辦法，迄時刁工欠席（即點可能毋著，愛閣查證）。
致使蔡个支持者真擘腹[peh-pak]，袂食袂睏，煩惱即種本質上个「排綠民調」，會予國民黨動員，來灌票予卡弱个民進黨候選人出頭，按呢馬英九著好選囉。眾儂批評蘇系即站仔，煞佮國民黨行真倚，重要幹部走去深藍个政論節目，佇咧批蔡揚蘇。國民黨个市長、立委，嘛反相出來呵咾蘇偌好拄偌好。
蔡陣營个儂，呼籲逐家「唯一支持蔡英文」來揬[tu̍h]破即種民調法个鬼計－－蔡對馬，著回答蔡；蘇對馬，著回答攏無支持。甚至閣鼓吹講，為著抵銷藍軍个灌票，蘇對馬，愛刁工回答馬，按呢才搝[giú]會開「蔡、蘇」个距離。
對泛綠選民來講，閣卡按怎都無願意投予馬。所以最後即種極頭[ki̍k-thâu]个應[ìn]法，實在予儂講袂出喙。鼓吹者講：這是因為初選辦法太歪tshua̍h，伊用小人步，咱是姑不將，袂用得傷古意。
我想想咧，蔡主席因為身兼候選人，確實有伊立場个為難。但是既然伊是黨主席，著愛概括[khài-kuat]承受初選制度个責任。若是即種做法，選袂出真正个賢能者，伊嘛著擔後果。
我做一个獨立思考个選民，支持蔡英文卻是有支持，總是，不過是一種相對个支持，意思是講，我並無認為伊已經好甲值得我犧牲家治做儂个原則，來講白賊。恁个初選制度有問題，是恁民進黨愛擔業果，毋是我綴恁去行歪路，講出違背心願个話。
政治是良心事業，嘛是一種妥協[thò-hia̍p]个藝術，若準蔡主席佇初選个階段，都無才調uì即个妥協个現實中來出頭，這著表示伊个才能、德行[hīng]猶閣無夠，我期待伊繼續奮發。話講倒轉，若準逐家直心直說[sueh]，回答民調，伊猶原會凍佇即款歹流擺[pháinn-lâu-pái]浮頭出來，著表示伊會堪得受考驗，實力有影讚[tsán]，值得咱閣卡交仗[kau-tiōng]伊來主持國政。
結論是，勿傷過寵倖[thíng-sīng]一个政治人物！即世間無天生个聖人，儂是愈刺激、愈磨練，才會愈提昇。人民愛徛予正，按呢政黨才毋敢閣私心用智，最後才真正會出賢能之士來領導[líng-tō]人民。
---
2011-04-26補記：遮有一篇文章，大概整理民進黨決定初選辦法，經過个情形：〈民進黨內到底誰在阻擋黨員投票〉
Comments powered by Disqus.