會講閣會寫个台語文𠢕儂，真僫揣，尤其是台語个生活文化各方面个主題。我想講，咱值得來辦一系列个台語文化講座，一個月一場（三點鐘至四點鐘，中途歇一擺至兩擺）、差不多十二場，一年久。
請高明个台語先覺來講（一場請一位來講演、抑是兩位合講，抑是請幾若位來座談），伊若袂曉寫台文，會後咱才替伊整理做台文出版。
總題是：「台語文化十二講」。以下是參考个主題：
一、台語个農業文化
二、台語个漁業文化（以上兩場包含相關个tsia̍h-si̍t文化）
三、台語个自然文化（動物、植物、礦物、天文、地理）
四、台語个文人文化（漢文先生个文化）
五、台語个音樂文化
六、台語个戲劇文化
七、台語个民俗文化（以喜事為主，出世、做生日、嫁娶…）
八、台語个喪葬文化（以喪事為主，包含風水觀念。以上兩場包含宗教文化）
九、台語个商業文化
十、台語个烏手文化（指機械、工業）
十一、台語个底層文化（乞食、賊偷、筊棍、moo-hui仙）
十二、台語个兩性文化（包含性交易个文化）
（十三、台語个建築文化）……
全程講台語，用探討文化主題个方式，將寶貴个台語在來語、外來語、俗諺語、唸謠、癖話、下[hē]神明个話、禮生个話（包括讀祭文）、師公、和尚、風水先、相命仙个話…… 盡量趁即个機會，來記錄從來毋捌有儂用台語文明確記音个台語文化資產。
每一个主題會使進一步分生出十二場！按呢一直湠，配點會前會後个田野調查，台語文化才記錄會較全面（毋敢講 tsiâu-tsn̂g），社會大眾也才較有機會全方位接觸著台語文化。
盡量勿揣學術界來做講者，怹華語毒中[tiòng]傷深，講袂出原汁原味个台灣話--無打緊，甚至講無幾句話就不知不覺puh出華語。
咱盡量來走揣民間个老師傅，伊捌真透，總是無慣勢進行有條有段[iú-tiâu iú-tuānn]个公開演講，所以佇會前，咱著愛先進行一段時間个田野採訪。咱採訪者來做遮个老先覺佮目今一般台灣儂个中儂，沓沓仔問出伊寶貴个智識。翕一寡影像，順序排列，佇演講个時，投射出來，予先覺看影像憑頭仔講落去。
過去个採集，攏是由學者出面去做田野調查，收集資料轉來才整理做文字、影音，再製了後發表，成就學者个名聲，將老先覺變做是被利用个素材爾爾。而且閣用北京話文轉寫記錄，低路、兩光，完全表現袂出台語文化个精神。
Comments powered by Disqus.