拚頭

今仔日倚晝仔[uá-tàu-á]遐，去銀行寄錢，入去先liu牌仔，邊=a坐 聽候[thìng-hāu]。姻个電腦台語報號系統真趣味，我先注意著伊塊報「X十號」个時，「十」是唸中調个tsap20。我想講，咁是中北部个系統廠商，一方面閣無讀變調，一方面第八聲閣唸做佮第四聲共款。紲落來，閣注意著伊講「X五號」个「五」是goo11。Ĕ，真巧嘛，是唸變調=个neh。按呢，咁講伊个「X十號」个「十」嘛是卜唸變調，不過伊是運用外口時行个台語教學法，「第四聲、第八聲互變」个講法，直接用第四聲本調來當做第八聲个變調？結果，聽起來根本to袂對同[tuì-tâng]。

所以，請逐家勿閣相信「第四聲、第八聲互變」即種無根據个講法矣！若是 -p, -t, -k 即三種韻尾个第八聲，變調以後个音峘，絕對佮 -p, -t, -k 第四聲个本調無sio-siâng。第八聲變調，會閣卡低一坎[khám]，是本調七聲內底所無个調。廈門型个Ho̍h-ló話，逐个聲調个基本變調，攏拄好佮某一个別款聲調个本調sio-kâng，單單即个p/t/k第八聲有伊koh-iūnn个變調。

我个精神隨閣予別項siânn--去，一个六十統歲个查夫儂，行入來，警衛[kíng-uē]嘛tsuăn坐落來唅伊話仙。姻講著寄定期个無啥錢，卜投資啥麼卡好，東東西西。警衛講啥麼貨仔「卡有拚頭[piànn-thâu]」，意思是風險卡大，毋閣若有趁，嘛趁卡儕。Oo-jí-sáng應伊講：「若卜愛有拚頭，竹仔園上有拚頭」。警衛仔gāng-gāng：「竹仔園喔……」。「竹仔一bôo攏嘛幾那个頭，竹仔園拚[piànn]起來專專頭。」

姻兩个是塊講無共款个「拚」啦。前一種是賭字運塊「拚卜[piànn-poh]」个拚，後一種是「整頓」个拚，佮「拚掃、拚房間」个拚共款。「頭」--字个意思嘛無共[kāng]。一个是抽象个「機會、可能性、形勢、勢面」个意思，閣有一寡北仔話【拼勁】个【勁】迄號涵義；一个是具體个樹木、植物[si̍t-bu̍t]个根部。

辦好對銀行出來，車騎咧，順路乘紲去oo-tóo-bái店予檢查看是按怎sé-luh攏ni̍h無反應。佇遐，聽著頭家塊共先來个儂客講，即馬按呢iòng好 塊騎，催tio̍h 加足輕門[khin-mn̂g]。

Hòo, 原來油門好催，叫做「輕門」喔。

轉來屏東故鄉，有影聽卡會著有局个台語。佇台中大都市敢哪無啥有儂塊講卡奇巧个台灣話。

今仔日學著即兩个詞，「拚頭」佮「輕門」，無用著啥款特殊个詞素，攏是簡單四常个字眼，共合做兩字詞，用佇平常話內底，儂講tio̍h suah-phah、嫷氣[suí-khuì]，我聽tio̍h 心適、sannh氣[khuì]。毋tsiah起興[khì-hìng]寫即篇講分恁聽。