「推展本土語言傑出貢獻獎」得主講「國語」發表感想

聽講舊年 2012 年得著「教育部推展本土語言傑出貢獻獎」有三位台語文个教授、老師，干焦一位吳老師用台語發表感言，另外兩位攏講「國語」。毋知原因咁是：

一、怹本身台語講袂輾轉，無才調做正式演講。抑是……

二、怹認為佇正式場合，愛講國語，台語只是鄉土語言，不登大雅之堂。抑是……

三、怹體貼記者佮校方，用台語發表，方便怹寫新聞稿。抑是……

四、怹自認是「蓋高尚、講國語个老師」，推捒台語文只是怹奉命行事个教學任務。怹真敬業來執行任務，著獎是應該个、感言講國語也是應該个。

怹平時為著推展台語文，付出遐爾大个心血佮貢獻，但是佇即个關重[kuan-tiōng]个時刻，毋知是考慮著啥因素，煞無用台語講演，來改變社會大眾認為台語無水準、無入流个成見，這對推展本土語言來講，咁毋是足扑損？