教育部台詞辭典「風騷」釋義無妥當

教育部臺灣閩南語常用詞辭典對咱台語詞 hong-so（風騷）个解說有問題，伊个第一義項：

1.風流。形容輕佻的樣子。例：看伊行路的款，實在有夠風騷。Khuànn i kiânn-lōo ê khuán, si̍t-tsāi ū-kàu hong-so. (看她那副走路的樣子，實在是輕佻到極點。)

頭前解說做「風流」，閣來「形容輕佻」，閣來例句用風騷來形容查某儂行路無端莊，愈寫愈離經。

這毋是教典才有个問題，是最近二十年一寡台語詞典受著華語「風騷」个意思影響，曲解台語 hong-so，甚至出現「淫蕩」个解說，hàm-kuā-kuā！

伊這第一義項毋是正台語口語个用法，第二義項才是咱鄉親咧講 hong-so 个意思：

2.愛玩。喜歡到處遊玩。例：囡仔人真愛風騷。Gín-á-lâng tsin ài hong-so. (小孩子家這麼愛玩。)　

台語 hong-so 較好个華文解說是「好（ㄏㄠˋ）遊逛」（蔡培火1969《國語閩南語對照常用辭典》），包含个意思有：無愛踮厝內，愛出去四界看、四界踅、趁儂鬥鬧熱。

形容儂「愛hong-so」難免有淡薄仔負面批評个意思，因為傳統个價值觀是「勤有功、戲無益」[Khîn iú kong, hì bû ik.]（出自《三字經》），但是這絕對無到「淫蕩」个程度，而且台語 hong-so 無分男女，並無較捷用來形容女性，教典第一義項个例句難免有抹烏台語，增加語言上个性別歧視个嫌疑。

準做近來有寡台語儂真正像教典第一義項按呢咧使用 hong-so，我認為這也愛徙去做第二義項，著將正台語用法列做第一義項才好。

東方孝義《臺日新辭書》（1931）个解說就有準（漢字照伊个，音標改做台羅）：

荒騷 hong-so：遊び好き。汝真－－，此[tsiah]遠來看戲。

（2017-04-09發表佇Facebook潘科元個人動態）