咱通[thang]將教育部台語用字，當做重要參考，但是毋通當做唯一个標準答案。伊有分兩種：
一種是經過一陣專家學者詳細討論、投票、公告个「臺灣閩南語推薦用字 700 字」，伊既然明文講是「推薦」，本質上就毋是「標準」，只是推薦社會各界多多利用。為著予台文早日「標準化」，我原則上歡喜盡量使用即套推薦用字，但是有進一步照我長期書寫台文个經驗佮研究，有佇十外个常用字採用別款寫法，予我个台文閣較[khah]精密。
閣一種是網站「教育部臺灣閩南語常用詞辭典」內底所用，超出 700 字以外个台語漢字，即部份因為討論了無遐充分，權威性相對較低。我就實用立場，若認為歹用，就無管伊。
舉例：「火熄[sit]去」，台語口語時常講「火 hua 去」，即个 hua，教育部台語辭典寫做「化」，伊註明是「替代字」，也就是講辭典个編者揣無本字、正字，就用一个倚意（意思接近）个訓用字，抑是倚音（發音接近）个借音字來替代。
伊真濟替代字我猶原會採用，但是只有第三聲唸法个「化 huà」--字，欲叫儂唸做第一聲 hua，傷勉強。這是就近代台語文立場來看，請毋通提古文註解 抑是中古音韻書「化」有唸第一聲來主張，按呢食古不化，只會增加現代語文使用者个痛苦。
「火hua」寫做「火化」就實用性來講，傷歹用，任何儂看著「火化」只會唸做 hué-huà，欲按怎叫儂唸做 hué# hua？
若照伊按呢寫，「火化去矣」有時表示「火熄去矣」，有時表示「用火燒了去矣」，兩種意思天差佇地，即種用字溝通效果太差，無值得採用。
本來負責制定台語文標準个教育部國語會，已經予馬政府廢掉，國語會个功能扑散入去全民教育司內底，無地位、無資源，咱欲向望伊會得快速回應台語文界个意見，較捷來做修訂、增補，雖然毋是「火燒罟寮－－無望」，恐驚也是「蘇聯雞卵－－僫等」。
註：「蘇聯雞卵－－僫等」是我自撰个孽詰仔話，蘇聯是「俄國」，「蘇聯雞卵」華語就是〔俄蛋〕，佮台語「僫等 oh tán」倚音。
Comments powered by Disqus.