台灣俗語：「唐山過台灣，心肝結規丸」。「唐山」唸做 Tn̂g-suann，是白話音。「唐」文言音 tông，現時一般台語儂知，但是對白話音 tn̂g 已經足生疏。
一、儂姓「唐」本來是唸白話音 tn̂g（佮「真長」个「長 tn̂g」、「胃腸」个「腸 tn̂g」仝音），後來有个儂 將即字个聲母唸送氣音，變做 thn̂g，佮「糖」白話音仝音。毋過，歌仔戲名演員「唐美雲」自稱 Tông Bí-hûn，因為歌仔戲發展到電視時代以後，怹真愛將本來是白話音个字詞改唸文言音來表現文雅、有學問。
像「相公」佇南管戲抑是老歌仔戲攏是講白話音 siùnn-kang，但是阮細漢聽電視咧做，咧改講 siòng-kong 矣。我二十年前佇新竹城隍廟看野台戲，台頂小旦叫怹翁婿 siùnn-kang，台跤一个 oo-bá-sáng 觀眾聽袂合，問伊身邊个朋友。可見台語變了有偌緊。
二、有「唐山 Tn̂g-suann」，也有「唐儂 Tn̂g-lâng」，唐儂就是漢人，「漢、唐」是華人有史以來上強个兩朝，所以華人才用即兩个朝代名來自稱。「唐儂」即个名稱佇台灣已經廢無--去，講「漢人 Hân-jîn」一般儂才聽較有。但是「唐儂 Tn̂g-lâng」佇東南亞个福建移民，猶原普遍有咧講。
三、福建移民所講个「唐山 Tn̂g-suann」，毋是中國河北个唐山（發生過大地動迄所在），是咧通稱「唐儂个土地」。因為閩、台語所講个「山 suann」，除了指 mountain，嘛有「土地、陸地」(land) 个意思。台語「起山 khí-suann」就是「登陸」，登陸个所在，無一定有 mountain。
有儂將「唐山」寫做「長山」，解說做福建遐有長長个山脈，這無通。台灣个山閣比福建卡長、卡峘，而且咁講「Tn̂g-lâng」嘛愛綴咧寫做「長儂」？
另外，「唐裝 tông-tsong」（唐唸文言音）就是「唐儂衫 tn̂g-lâng-sann」（唐唸白話音）。但是華語〔長袍馬掛〕，台語是「長衫馬掛 tn̂g-sann bé-kuà」，這才是「長」字。「袍」即字，台語唸第三聲 phàu，佮「砲」仝音，親像「旗袍 kî-phàu」。布袋戲尪仔个武生，身上加tha̍h一領披風，叫做「袍仔 phàu-á」（第三聲个字，拄著「仔」愛變第一聲）。
「唐山過台灣」即句話予咱知影，台灣自古無屬佇「唐儂个土地」，唐山還唐山，台灣還台灣。移民者用人口、經濟、武力个優勢，硬欲同化原住民，若因為按呢，就將台灣變做是「唐山」个一部份，這是野蠻个侵略[tshim-lio̍k]。
台灣客話有講「長山過台灣」，嘛有講「唐山」，總--是，廣府話，抑是馬來西亞个客話，攏是講「唐山」，毋是「長山」。
「漢人 Hân-jîn」即个詞，古早台語無按呢講，是講「Tn̂g-lâng」，無論是十九世紀个台灣府城教會報 白話字文獻，抑是 1931 年台日大辭典攏是按呢，台日大辭典 Tn̂g-lâng 即个詞條，漢字寫做「唐人」，毋是「長人」。台日大辭典根本無收「漢人 Hàn-jîn/lâng」，可見「漢人」即个詞佇日本時代中期以前，台灣老百姓个口語罕得講著。
台語變了傷緊，現代台灣儂所知个台語，已經佮古早差足遠。語言、文化發生斷層，真濟台語智識，當今台語儂難免會用聽音生義个方式來做無根據个聯想佮解說。
Comments powered by Disqus.