書介(006)《臺南縣閩南語諺語集(八)》

• 冊名：臺南縣閩南語諺語集(八)
• 系列：臺南縣民間文學集16
• 講述者：邱瑞寅（74歲）
• 採錄整理者：林培雅
• 總定稿：胡萬川
• 地點：白河鎮圖書館
• 出版者：台南縣政府
• 日期：2010年12月
• 頁數：269
• ISBN: 978-986-02-6457-9

白河古早叫做店仔口，有一條白水溪，大正九年，將「店仔口街」改名做「白河庄」。「河」--字現現毋是正範[pān]个台語地理名，「溪」才是。

邱瑞寅先生是在地个文史達人，讀過兩年日本冊、幾年仔中國冊，國小畢業，佇暗學仔讀漢文六年。做過菜市仔、記者、貨運、店仔口文史協會顧問、白河玉山吟社社長，人情世面看透透。退休了後，佇國中小做母語教師，貢獻伊个台語智慧，通予咱敬服。

即本冊是我佇 iLib 電子圖書館借个，可惜本系列目前只有即本有電子冊好借。

實際佇地方採錄个俗諺語上可貴个就是有一寡「干焦遮有別位無」，表現在地風土人文歷史特色个話語。

本冊三份一是諺語，三份兩是孽詰話（歇後語）。諺語个部份，像：

p.36 火燒白水溪，起巖前來賠。 [Hué sio Pe̍h-tsuí-khe, khí Giâm-tsîng lâi puê]

甘為霖牧師佇同治三年(1874)創建白水溪教會。隔轉年，當地土豪吳志高（又名吳仔墻 Gôo-á-tshiûnn），怨慼外國儂，聽風水仙使弄，講祖墓面對教會歹吉兆，暗靜[àm-tsēnn]派兵打扮tsing-piàng-賊，火燒教會，甘牧師險予害死，走去嘉義告官。吳志高賠銀一百箍，閣佇巖前新起一間教會和解。1935年、1955年教會兩擺設立「甘為霖牧師遭難記念碑」。

p.39 吳仔墻真慷慨，提錢倩人做禮拜。

冊裡解說講，事件了後，白水溪教會牧師認為堂堂官府，火燒教會，信徒生驚，毋敢閣來禮拜，要求官府負責，逐禮拜愛有偌濟儂來教堂，嘉義知縣閣叫吳仔墻伐落，伊只好開錢逐禮拜倩儂上教堂做禮拜。

孽詰話个部份，像：

p.96 麒麟尿洗身軀－－免 lù。

講白河枕頭山，山脈宛然像一隻麒麟，所以閣叫做麒麟山，麒麟頭會噴火，形成水火同源个奇觀。麒麒腹拄好就是關仔嶺溫泉，傳說講遮个塗漿溫泉就是麒麟尿。溫泉洗了，身軀摸著𣻸𣻸[siûnn]，但是已經夠額清氣，毋免閣 lù 矣。即句孽詰話是應用佇代誌已經順利咧進行，毋通閣厚操煩，加做一寡戇工。

講述人邱瑞寅先生，家己有做真濟四句聯來配合遮个俗諺語，真𠢕，像：

溫泉泉水若土(塗)膏
燒燒滑滑擱(閣)澇澇[lô]
自古人言麒麟尿
毋知你想有影無