「曾經」台語唸做 tsan-king？

「曾經」个台語正音是 tsîng-king，唸 tsan-king 是俗音。

本文

「曾經」即个詞，毋是台語本底就有，是吸收書面語來个。古詩文就有即个詞，但是咱台語儂吸收即个詞來講，應該是看華語文章才開始个。

「曾經」我聽電台台語節目攏講 tsan-king，其實是hut了毋著去，「曾」只有佇口語个字姓，才唸 tsan 即音，若是「曾經」，愛唸 tsîng-king，「曾」用佇副詞，表示有經驗過，口語講「捌[bat]」，即種意思是第五聲，只有一音 tsîng，無 tsan 抑是 tsân 个唸法。

印證：有兩个常用口語詞「未曾 buē-tsîng」、「未曾未 buē-tsîng-buē」，就是唸 tsîng，只不過，台灣有真濟儂唸即兩个詞个時，是採用泉腔變調變低調，所以有時會掠做迄个「曾」是第七聲 tsīng，其實就是第五聲 tsîng。

俗語：未曾生囝，代先號名。Buē-tsîng sinn-kiánn, tāi-sing hō-miâ.
字面解說：囝 都[to]猶未生咧，未曾未，就欲先號名。

「曾經」即个詞个「曾」字，當然愛比照仝意思个「未曾、未曾未」个「曾」來唸 tsîng-king，意思才有通，曷[a̍h]會使得照「姓曾」个 tsan 來唸 tsan-king？豬母牽對牛墟koh-！

語言一旦約定俗成，就會形成強大个人群壓力，想欲毋綴逐家唸，第一點愛克服家己个礙虐感覺，閣來準做提出勇氣講出來，煞不時會造成溝通障礙，只好放棄。我雖然主張 tsîng-king 才是正音，但是我家己根本袂主動去講即个書面語詞，只不過，拄著朗讀稿有即个詞，欲指導儂唸，煞不止躊躇，心內想欲維護正音，但是又驚仔評審不懂[put-tóng]，共儂扣分，我無功勞，煞予學生怨嘆。

---

面冊網誌留言

Shinya Takebayashi
兩種讀法都有聽說過。

Yoan Christo
臺語就是強欲變50%華語詞+50%臺語詞， 真正夠害矣

簡秋榮
我是唸tsîng-經ê人,毋閣感 覺講tsan經ê強欲占較大面.

林紹良
我的環境範圍自1970年左右所聽著的 曾文水庫 攏唸tsan1-bun5 tsui2-khoo3

潘科元
林紹良 先生，曾文水庫 名稱來自 曾文溪，曾文溪 名稱由來，根據維基百科有兩種講法，一種是講荷蘭時期有一个叫做「曾文」个儂佇遐開墾；一種講法是講來自「罾文渡」。可見這佮「曾經」語義、語用全然無關係，字音也無必要仝款。

簡秋榮
教典干焦收列「未曾 buē-tsîng」、「未曾未 buē-tsîng-buē. 煞無收列「曾經tsîng-king」.

潘科元
「曾經」生活中較無常用

簡秋榮
「曾經」嘛算生活語言

簡秋榮
本底就唸「曾tsan文水庫」.在來我嘛毋捌聽人講做「tsîng文水庫」.仝款~ 姓「曾/Tsan」.嘛無人講姓「Tsîng」. 這佮「曾經tsîng-king」ê「曾」ê唸讀,自是仝字無仝音.無仝語用.

Liz Lim
「拄著朗讀稿有即个詞，欲指導儂唸，煞不止躊躇，心內想欲維護正音，但是又驚仔評審不懂」←贊同！

林心智
最好還是說「bat」就好