1. 前提：當今欲救台灣，只有革命。革命个簡單定義，是設法偃倒當權者，趕怹走，毋予怹閣掌權，因為咱已經對怹徹底失望，毋相信怹會改好。
2. 最近捷捷出現使用「性攻擊个話語」（就是 tshoh-kàn-kiāu）來示威，當做革命个手段之一。包括使用強勢个英語，佮弱勢个台語。
3. 佇贊成革命个儂內底，有儂感覺第 2 點算是非暴力，當然會用得。
4. 佇贊成革命个儂內底，也有儂感覺第 2 點算是暴力，而且怹是主張非暴力革命，按呢怹就會反對第 2 點。
5. 不過，也有根本無想欲革命，但是激曖昧个儂，會指責第 2 點是暴力个。按呢煞予咱分袂清，伊到底是反對第 2 點本身个暴力，抑是為著維護當權者，揣空揣縫，欲化消革命者个力量。
6. 以上是徛佇革命者个立場來思考。但是我閣較重要个自我定位，是「母語救生員」，若徛佇即个立場，我實在無贊同使用「性攻擊个台語」來示威，因為用按呢鼓吹台灣全民來革命，會加速台語个滅亡。理由如下：
一、民主運動欲成功，著愛引起全民關心佮投入，全民當然包括男婦老幼，這其中有袂少儂會對【使用性攻擊个語言】大反感，往往會牽拖來對即个語言本身也反感。
二、尤其是台語佇真濟台灣民眾个心目中，早就是【次等語言】（毋比英語、華語），台語攏予怹提來當做感情衝動、粗魯發洩个路用。相對來講，華語是理性討論、深入思考个路用。
實例一：老母佮囡仔講道理个時，用華語；受氣大罵囡仔个時，用台語。
實例二：妖嬌个都市小姐佇餐廳內講華語討論問題，有時參幾字仔台語，攏是【袂爽、揬膦[tuh8-lan7]】即種詞。
結論：用性攻擊个台語口號進行民主運動，雖然佇運動現場有效果，但是對台語悲慘个運命來講，是火頂添油，予台語愈無法度用佇理性表達，予真濟民眾對台語愈反感，予新一代受禮貌教育大漢个爸母愈無愛教囡仔講台語。
參考圖片：
1. 「賽拎娘國防部」
Comments powered by Disqus.