討論台灣史，抑是台語腔口个時，不時會講著福建地名「漳州、泉州」。因為現代台語儂个台語已經佮頂勻个脫節，所以有真濟音是家己想、家己著，無照台灣先賢个呼音去唸，像「泉州 Tsuân-tsiu」真濟儂煞講做 tsuânn-tsiu；「漳州 Tsiang-tsiu」真濟儂煞講做 tsiong-tsiu。
「泉州」个地名真古，隋唐就有，扑算是官方所號个正式地名，自來攏唸文言音 Tsuân-tsiu。現代台灣儂干焦知影白話音「水泉」个「泉」是 tsuânn，袂慣勢抑是毋知「泉」有文言音 tsuân，所致才將「泉州 Tsuân-tsiu」講做 tsuânn-tsiu。
古俗語「福建完完，毋值漳泉」[Hok-kiàn uân-uân, m̄-ta̍t Tsiang-Tsuân.] 即句話是咧講，通[thong]福建省，就是漳州、泉州上蓋富裕、鬧熱，福建別位無一所在較贏漳泉。咱聽即个「完完」愛佮「漳泉」押韻，各位「泉」若唸做白話音 tsuânn，就袂押韻啦。
論到「漳州」个「漳」--字，照講是「彰化」个「彰」--字个仝音字（「彰、漳」佇廣韻个切音攏是「諸良切」）。「彰化」有儂慣勢講 Tsiong-huà，有儂慣勢講 Tsiang-huà，這無問題，因為彰化倚海是泉州腔，泉州腔「彰」--字唸 tsiong，若彰化倚山是漳州腔，「彰」--字漳州腔唸做 tsiang。
但是照台語傳統文化來論，「漳」个唸法上好毋通比照「彰」去自由選用 tsiong、tsiang兩音之一。因為「漳州」是蹛漳州儂，漳州儂攏講怹是 Tsiang-tsiu，袂講怹是 Tsiong-tsiu；抑若泉州儂欲稱呼漳州咧？有兩種，一種就是尊重漳州儂个呼音，亦叫怹 Tsiang-tsiu，一種是唸特殊个白話音 Tsing-tsiu，Tsing-tsiu个講法佇台灣罕得用，目前佇福建泉州較有機會聽著。
總--是，尊重漳州儂對家己地名个稱呼講做 Tsiang-tsiu，才是台灣傳統个習慣。二十幾年前，我去拜訪八、九十歲个台灣鄉親，就準是泉州腔足純个所在，怹嘛是攏講「漳州 Tsiang-tsiu」，無講 Tsiong-tsiu，怹會問我講「恁是漳[Tsiang]--个，抑是泉[Tsuân]--个？」
無論是查考台語文獻，抑是布袋戲、唸歌个大師，攏講「漳 Tsiang」，無講 tsiong。
清朝時代，台灣定定發生「漳泉拚 Tsiang-Tsuân-piànn」，「拚」文言詞叫做「械鬥 hāi-tòo/tiò」。其中，咸豐九年佇艋舺引起个漳泉拚，代誌个起因，聽講是泉州儂佇龍山寺普度，規隻个豬、羊牲禮，佇廟埕排甲滿滿是，真豐沛，有一陣漳州儂行--過看--著，大聲講「即爿全豬，迄爿全羊」。
因為「全」佮「泉州」个「泉」仝音，泉州儂一聽，就知影漳州儂是用雙關語「即爿泉豬，迄爿泉羊」，欲蹧躂泉州儂，罵怹是豬羊，泉州儂就對喙應：「將[tsiang]豬排過來，將[tsiang]羊排過去。」「將」--字，泉腔是講 tsiong，但是伊刁工學漳腔講 tsiang，佮「漳」--字仝音，按呢意思就變做「漳豬排過來，漳羊排過去」。
袂直啦！相駁喙[sio/sann poh-tshuì]煞舞弄甲變大相殺。咱照對方个呼音講話，是欲尊重對方，但是若刁工「學話」來恥笑--儂，傷害顛倒大。
補充：
福建閩南語文名家林建輝先生來寄話肯定：『正正是按呢。正港的廈門話、同安話嘛是講Tsiang-tsiu 、Tsuân-tsiu。』
鹿港儂許嘉勇老師來賜教指出：『阮鹿港有一个漳州埔（漳州塚），也是我碩論其中个內容，只个地號名就佇阮塊邊--頭一舖里遠，佇我斯當時調查个經驗，鹿港老勻--个絕大多數是讀做「tsiong-tsiu」，罕得聽着「tsiang-tsiu」；古蹟學者李乾朗（淡水人，同安腔），伊計是讀做「tsiong-tsiu」。』
在我想，「漳州埔」即个鹿港地頭名可能已經在地化，鹿港儂是照怹家己个音韻規則去唸，咱愛閣進一步調查鹿港老輩儂按怎稱呼福建迄个漳州。
Comments powered by Disqus.