台語疑問詞「啥乜」，教育部寫「啥物」

台語疑問詞【啥乜 siánn-mih】其實是同義複詞，【啥】就是【乜】、【乜】就是【啥】，【啥代？】就是【乜代 [mih tāi]？】就是【啥乜代?】、【啥乜代誌?】。

但是台語優勢腔袂慣勢用一字【乜】做疑問詞，毋是講一字【啥】，無，就講兩字【啥乜】，毋久泉腔定定講【乜】，佇南管戲文當然也不時看著、聽著。【乜】是傳統用字，通行至少幾百年囉。

聽講教育部台語漢字小組，頭版所定个也是寫「啥乜」，公告了後，煞真濟儂反對，結局毋捌个聲勢較大，tsua̋n改做錯誤个「啥物」，將疑問複詞誤解做是【疑問詞+名詞】个結構。

即幾年來，阮一直向望即个嚴重个失誤會凍改正，但是最近聽著一个足iàn-khì个消息－－推薦用字700字欲就按呢一直用，無愛閣修訂矣！

【乜】有各種發音變體，像阮南部儂攏講做第二聲 mí，變調變第一聲，像【啥乜儂 [siánn-mí lâng]？】。疑問詞【乜】也時常轉用做不定指示詞，像【某乜儂 [bóo-mí lâng]】。教育部辭典分寫做【啥物】、【某乜】，其實即兩个攏是【乜】。

另外確實有「啥物」个詞，台日大辭典有收（伊漢字寫做「甚物」），漳腔唸 siánn-mi̍h，泉腔唸 siánn-mn̍gh，但是彼是「啥乜物件」个意思，佮單純个疑問詞「啥乜」無仝。但是照目前教育部用字，煞糊混去，按呢「啥乜物件」，變做錯誤閣歹讀个「啥物物件」。

【乜】閣有別種用法，像「乜使[mih-sái]著按呢？」是「曷使[a̍h-sái]著按呢？」个意思。這佮【啥】就毋是同義詞素，總--是，「啥乜」確實是同義複詞。