有一種蓋重要个恒春歌仔調，伊个名稱上蓋時行个寫法是「思想起」，請問即種調，到底按怎叫？照「書齋學者」个氣頭[khuì-thâu]來論，「思」有兩種音：平聲su佮勾破去聲sù。「想」个泉腔文音是sióng，話音是siūnn，閣有勾破上聲siúnn；「想」个漳腔文音是siáng，話音是siōnn（毋知有勾破上聲siónn無？），「起」扑算干那khí个音。照遮个可能性，組合落去一直臆[ioh]、一直推[tshui]，到甲咱頭毛喙鬚白，un-ná鬥袂出一个正確答案！
閣再北仔話儂亦褻體仔搡勢[siat-thái-á sáng-sè]，姻tsiah無塊kuàn-thài汝台語按怎講。漢字按怎寫，姻著照漢字唸做ㄙ ㄒㄧ ㄤˇ ㄑㄧ ˇ。毋若按呢，逐家閣照【思想起】即三字，佇即種恒春調頂頭，製造儕儕浪漫个幻想，重重疊疊[tîng-tîng tha̍h-tha̍h]，袂了袂盡。
窮真[khîng-tsin]，儂是叫做su11-siang22-ki33，佮「思想起」即三字無一字鬥會bā！音小可倚倚，毋閣現拄現各樣[koh-iūnn]。豬有四跤，有鼻目喙，有尾溜；牛嘛有四跤，有鼻目喙，有尾溜。按呢著會使共豬母牽去牛墟是毋？
卜利用文化个舊元素來創新、創作，當然可以。毋閣愛將創作佮保存分予清楚。卜創新晉前，至少愛先老老實實記錄伊个本來面貌。su11-siang22-ki33即三个音節，無一定是漢語，是漢語嘛無的確有對應啥麼漢字。硬死揣漢字來鬥，是卜量早消滅儂个文化是毋？
另外有儂寫做「思相枝」，按呢有卡接近一絲仔，毋閣猶原無對tâng。結果，有民謠研究者著予彼漢字拖落làm，tsū按呢唸做su11-siong22-ki33。袂輸是用台灣優勢音塊唸第二字咧。若準第二音節tsiânn-si̍t是「相」，當然漳音是siang，對應个泉音是siong，唸siong佇台灣愈佔愈大面。毋閣佇咱無才調確定迄三字到底是毋是漢字，到底是啥意思以前，先tsun-tshûn儂个語言，完全照儂个講法是卡好。其他个寫法閣有「思想枝」、「自想起」、「思雙枝」、「樹雙枝」，無論叨一種，卜唸會準，阿婆=a生囝，誠拚咧。
小弟對漢字，有一種命底登戴[miā-té-ting-tài]个熱愛。毋閣，我嘛深深了解漢字个不足佮制限。咱勿閣將漢字當做kē路个注音符號矣啦。
Comments powered by Disqus.