漢字台文無必要標記輕聲？

本文

漢字台文標記輕聲真要緊！

台語个輕聲變化實在太濟太幼，非常僫得完全掌握，但是輕聲講會好勢，台語就加足媠。目前教育部漢字台語文个標準規格，就是一律無標輕聲記號，將輕聲記號歸做台羅標音符號个一部份，無愛予伊來佮「正統个漢字」濫交參。

我是認為，理想个漢字台文，愛將輕聲記號納入去，予伊歸屬標點符號个性質。

即幾工咧研究台語朗讀稿，先看，才聽真平个錄音稿來參考。雖然伊大部份个輕聲攏會曉唸，但是猶原有走爭个所在，像〈阿母的相機〉：

「看遮、看遮，笑一个五仙喔！」錄音者無唸輕聲，唸做 tshiò-tsi̍t-ê# gōo-sián# őo。可能伊傷少年，囡仔時代無機會聽著大儂用台語講即句，這阮細漢定定聽著，是講做「笑--一--下，五角」[tshiò--tsi̍t--ē, gōo-kak]

雖然是滾笑話，但是猶原有語意个重點，這是欲講「欲翕矣！愛笑，毋通無笑，汝若笑，我就予汝五角」（事實從來毋捌予--咱啦），毋是欲講「汝若笑一下，我就予汝五角；若笑兩下，我就予汝一箍」。重點就是「笑」，毋是笑幾下，按呢是動詞「笑」唸本調，「一下」唸輕聲才較通。

（2023-10-22補充：另外，台語是「笑一下」毋是「笑一个」，會講做、寫做「笑一个」是予華語〔笑一個〕个誤導所致。）

閣來：

「講著這陣的社會，毋管手機仔、平板電腦抑是相機，無論大人抑是囡仔，攏提佇手裡。若想欲翕相，行到遐、翕到遐，袂輸咧食雞肉飯遐簡單。」

其中「行到遐、翕到遐」，伊照普通變調，唸 kiânn-kàu-hia# hip-kàu-hia#。即句話，若是欲強調「地點」，行到迄所在、就翕到迄所在，按呢就像錄音者按呢唸普通變調。

但是咱若欲強調「翕」个動作，因為有巧路个細台相機扲[gīm]佇手裡，會使配合「行」个動作隨時翕、即時翕，將「行」佮「翕」提來做對比，就著講 kiânn--kàu--hia, hip--kàu--hia，強調現代相機个行動力。這種媠氣个講法，相信少年儂普遍袂曉得！

無論按怎，作者若有標明伊个輕聲，對讀者來講，就免得一儂激破頭腦、兩儂諍到腫頷、三儂吵甲相刣。若是作者个台語一流媠[it-liû-suí]，伊寫个台文閣攏有標輕聲，按呢對讀者、學習者台語程度个提升，幫贊毋知欲有gua̋大咧！

補充：即種句式，若是無講地方詞，干焦「行到、翕到」，按呢的確著唸 kiânn--kàu, hip--kàu，所以著寫「行--到、翕--到」。

下輩儂佇遮較僭權，欲姑情各位台文先進，毋通學教育部个低路步，咱寫漢字台文，若是句尾助詞，因為容易判斷，所以較毋免常在標記輕聲，像「伊來矣」「伊走矣」，即種有影是較無需要；但是若像頂面迄種例，上好攏將輕聲記號註起去，予儂好讀、好傳承。這是咱對後世囝孫个貼心。

陳文欽
FB 何時可以講話 !? 看文字, 很難看出文章的巧妙差異

Seng-hian Lau
阮咧做《臺江臺語文學》文字編輯的時，就準是全漢字的作品，嘛是有共用輕聲符號，毋過，袂免得落勾，閣有，阮程度有限，嘛無才調做甲像科元兄講的遮齊全、媠氣就是。

Liz Lim
咱較會注意著「應該輕聲無輕聲的」，袂去注意「家己自然讀輕聲的」有標抑是無標。若是毋管會注意著的、袂注意著的，全部共輕聲標起去，按呢規篇輕聲會足濟。就比賽來講，文章內底佗位愛輕聲，就是看指導老師的工夫囉。

另外，若伊是寫「笑一个五角」，按呢確實是咧講笑，有「笑兩个一箍」的意思，咱口語確實會按呢講笑。若欲唸正常的輕聲，照教育部的用字，伊愛寫「笑一下五角」。

有的語詞，是輕聲抑會使、變調本調抑會使，若是做比賽的文章，共伊標落去，按呢就是咧講「另外一種是錯誤的」，嘛是一種無必要的標準化。

我認為較重要的，顛倒是像老師你寫的這款文章，共重要的聲調變化分析予清楚，予較濟人有機會了解台語音韻的道理。

Seng-hian Lau
書寫規範本身攏無輕聲標註的時，就是讀者愛家己臆，作者到底自本是佗位愛讀輕聲，佗位刁工無愛輕聲，咱就無法度通知矣…

Liz Lim
若是語言自然著愛讀輕聲的所在，毋免標嘛會知；若是兩種攏會使的，我是感覺無一定愛照作者的意志，應該毋但台語有這款範圍的自由？閣來，變調的問題，可能閣較嚴重，咱嘛無標咧。

Pochung Pektiong Chen
信望愛輸入法若是拍 “jipkhi”, 會出現

入去(ji̍p-khì)
入--去(ji̍p--khì)

兩組通選。毋過這款漢字有加輕聲个詞收猶無夠儕。