〔燴飯〕个台語

台語 lóo-bah，漢字寫「滷肉」；若「魯肉」是卡通俗个借音寫法。

有一種牽羮个料理，像「白菜滷」，家母也將華語〔燴飯〕叫做「滷飯 lóo-pn̄g」，這佮「羹飯」無仝，羹飯卡濟水分，愛用碗公貯；「滷飯」是將菜滷淋起去白飯頂面，用盤仔貯。

毋過我若去外口素食店按呢叫，捀來个物件會變做「滷肉飯」。這是素食仿臊个滷肉飯，完整个講法是「素滷肉飯」。一--來，按呢講，卡囉嗦；二--來，干焦講「滷肉飯」閣驚予儂誤會做是臊个，最後就簡單講做「滷飯」。

結局就是食袂著我欲愛食个，閣予頭家娘歹聲嗽：「〔燴飯〕to̍h﹝燴飯〕，講啥乜「滷飯」？」

「啊無，〔燴飯〕台語按怎講？」

五六十歲个台灣儂頭家娘應講：「阮攏講 ㄏㄨㄟˋ　ㄏㄨㄢˋ ！」