石笱（日語「石籠」）

攝影者不詳 | 〔石籠上的男子〕 | 碧潭，1930s。相片是對面冊「夏門攝影企劃研究社」轉貼過來个。

這台語叫做「石笱 tsio̍h-kô」，簡稱「笱 kô」，用籐 縛竹仔，做成圓錐形个籠仔，偃倒落去溪裡，內底囥石頭。

石笱是以前重要个水利設施，佇中部濁水溪有大量使用，做護岸，改變水路，引溪水入來農田灌溉。若風颱做大水，石笱擋大水擋袂椆，就會崩去，但是按呢顛倒好，予大水 順原來个溪道衝對大海出去，袂淹入來庄裡。

這比 khòng-ku-lí (concrete) 个現代工法卡環保、卡有智慧。但是創這足辛苦，愛用一大陣壯丁，褪[thǹg]光光跳入去深深个溪內做。若穿衫落去，一下無細膩，衫予竹仔勾著，一時脫[thuat]袂開，恐驚就會駐[tū]死佇水底。

石笱个下底面 若做圓形个，叫做「圓笱」；做四角形个，叫做「角笱」。

濁水溪个石笱，佮相片中碧潭个石笱仝款形體。佇 1932 台日大辭典有畫石笱个插圖，比較起來，畫了無完整、無精確。

各位看辭典內底日文个解說，寫做「石籠」，所以即張日本時代个相片號做「石籠上的男子」就是沿用日文寫法。但是，這毋是台語講法！咱一定愛扑拚恢復台灣在地物件个台灣名稱，毋通干焦會曉日語名、華語名。

蕭平治老師賜教：『有人講做lam-á-kô，用桂竹縛--ê，mā有用鉛線絞--ê，60年前阿伯kap老爸、兄哥時常去濁水溪(Lô-chuí-khe)、烏溪(O͘-khe)做lam-á、絞lam-á，鉛線chiâⁿ-ngē，需要kā鉛線chhng入絞仔(一个鐵管)chiah絞 ē tín-tāng，chiâⁿ粗澀。』

『桂竹仔做ê lâm-á-kô，二八水(Jī-pat-chué)(彰化縣二水)kap田中央(Chhân-tiong-ng)(彰化縣田中)攏有展示品，有閒來田中chhit-thô，chiah chhōa你參觀。』